چک رسنیو د یو شکمن روسي ډیپلومات هویت په ډاګه کړ
د دې سړي په بکس کې د "رایسین" په نوم چې وژونکي زهرجن مواد دي، موندل شوي وو.
د چک جمهوریت یو ټلوېزیون راپور ورکړی چې اندري کانچاکوف دوه میاشتې مخکې پراګ ښار ته ورسېد او له هوايي ډګره د روسیې سفارت ته ولېږدول شو.
کانچاکوف چې ۳۴ کلن دی، دا تورونه ردوي او وايي په بکس کې یې شیریني او د مکروب ضد درمل ځان سره راوړي وو.
په پراګ کې د روسیې سفارت د دوشنبې په ورځ پر خپله فېسبوک پاڼه خپره کړې اعلامیه کې وویل چې اندري کانچاکوف د ناڅرګندو ګواښونو سره مخ شوی دی.
په اعلامیه کې راغلي، د روسیې سفارت د چک له پولیسو غوښتي چې د دې سړي لپاره جدي امنیتي تدابیر ونیسي.