پامپیو: روسیه د امریکايي ادارو پر خلاف په سایبري بریدونو کې لاس لري
د امریکا د متحدو ایالتونو د بهرنیو چارو وزیر وايي، دا څرګنده ده چې روسیه د امریکا حکومتي ادارو پر خلاف په سایبري یا انټرنټي حملو کې لاس لري.
په دغو انټرنټي حملو کې د نړۍ په سطحه هم ځینې تجارتي ادارې په نښه شوي دي.
مایک پامپیو پرون جمعه (د لېندۍ ۲۸مه) په یوه ټلوېزیوني خپرونه کې وویل، د امریکا په حکومتي سیسټمونو کې اساساً د یو لړ کوډونو د ځای پر ځای کولو لپاره د درېیمګړي د سافټوېر د کارونې د پام وړ هڅې شوي دي.
ښاغلي پامپیو وویل، دا څرګنده خبره ده چې په دغه ډول فعالیت کې روسان دخیل دي، خو روسیې رسماً کومه تبصره نه ده کړې.
تر دې مخکې د امریکا حکومت له دې ویلو ډډه کوله چې د انټرنټي حملو تر شا د چا لاس دی او ولسمشر ډونالډ ټرمپ هم په څرګنده پر دې موضوع خبرې نه کولې.
د امریکا د ټکنالوژۍ لوی شرکت مایکروسافټ ویلي چې په وروستیو کې یې ۴۰ مشتریان د زیان-رسوونکو سافټویرونو ښکار شوي چې ۸۰ فیصده یې په امریکا کې مېشت دي او متخصصان وايي، دا ډول هڅې حساسو حکومتي معلوماتو ته د هککرانو د نفوذ زمینه برابرولی شي.