د اذربایجان ولسمشر په سلګونو زندانیان وبخښل
د ټولو خوشې شوېو زندانیانو شمېر ۶۲۵ ته رسیږي چې په دوی کې څلورتنه د اذربایجان د ولسي جبهې د ګوند غړي دي. دا د حکومت مخالف سیاسي ګوند دی.
په دې کسانو کې نژدې دیرش تنه په ۲۰۱۵ میلادي کال کې له پولیسو سره د اخ وډب پرمهال بندیان شوي وو، همدا راز د یوه اسلامي ګوند غړی چې په ښوونځیو کې یې د حجاب پر ممانعت اعتراض کړی و، له بنده ازاد شو.
د نژدې سل تنو نورو د بند موده نیمایي ته راکمه شوې ده او درې تنه چې په عمري بند محکوم و، د بند موده یې ۲۵ کالو ته راټیټه شوه.
د بشري حقونو فعالان وایي، په اذربایجان کې شااوخوا یو نیم سل سیاسي زندانیان شته، خو باکو وایي چې هېڅ سیاسي بندي د دې هېواد په زندانونو کې نه شته.