د جنوب ختیځې اسیا د څو هېوادونو مشران د برما حکومت سره غږیږي
د میانمار یا برما پوځ د فبروري په لومړۍ نېټه د یوې کودتا په پایله کې د آونګ سان سوچي په مشرۍ ملکي حکومت له واکه لېرې کړ او له هماغه راهیسې د ډموکراسۍ د پلويانو مظاهرې پیل شوي دي.
د اندونیزیا په پلازمېنه جاکارتا کې د میانمار د پوځي کودتا له مشر جنرال ماین اونګ هلاینګ سره په نننۍ غونډه کې د جنوب ختیځې اسیا د همکارۍ د ټولنې ازیان د شپږو هېوادونو د دولتونو مشران او د درېیو نورو د بهرنیو چارو وزیران ګډون لري، خو د دې خبرو بریا ته ډېره تمه نه شته.
د سنګاپور د بهرنیو چارو وزیر ویویان بالاک ریشنان د ازیان ASEAN اتحادیې د غړو هېوادونو د سرمشریزې په درشل کې وویل، په میانمار کې روانه تراژيدي به د دې هېواد لپاره ناوړه عواقب ولري.
په میانمار کې سیمه ییزې څارونکې ډلې وايي چې د کودتا ضد معترضانو پر ضد د پوځ د ځپونکو عملیاتو په ترڅ کې تر اوسه له ۷۰۰ زیات کسان وژل شوي او زرګونه نور بندیان شوي دي.