امریکا کې د چین سفارت د کرونا د سرچینې معلومول سیاسي لوبه ګڼي
دغه سفارت نن پنجشنبه (د غبرګولي ۶مه) په خپله وېب پاڼه کې په یوه خپاره کړي بیان کې ویلي چې په دې وروستیو کې یو شمېر کسانو هغه پخوانۍ سیاسي لوبه چې نړۍ ته د کرونا ویروس له کوم ځایه خپور شوی؟ پیل کړې ده.
په بیان کې ویل شوي چې چین د کووېډ – ۱۹ د لومړنیو پېښو او په ټوله نړۍ کې د بیولوژي د پټو لابراطوارونو په اړه د هر اخیزې څېړنې ملاتړ کوي.
دغه څرګندونې وروسته له هغې کېږي چې د امریکا ولسمشر جو بایډن د امریکا د استخباراتو له ادارو وغوښتل چې د دغه ویروس د سرچینې د معلومولو لپاره دې خپلې هڅې دوه چنده زیاتې کړي.
ولسمشر بایډن په خپاره کړي بیان کې ټینګار کړی چې تر دې دمه ترلاسه شوي معلومات بشپړ نه دي، څو څرګنده شي چې کرونا ویروس له څاروي انسان ته لېږدیدلی که له لابراتواره بهر خپور شوی دی؟
له هغه مهال راهیسې چې د کرونا ویروس د لومړي ځل لپاره د ۲۰۱۹کال په دسمبر میاشت کې د چین په ووهان ښار کې پیدا او نورۍ نړۍ ته خپور شو، تر اوسه دا مساله نه ده هواره شوې چې دغه ویروس له کوم ځایه سرچینه اخیستي؟ او څرنګه انسانانو ته لیږدیدلی دی؟
چین وایي، د کرونا وبا د خپرېدو مسوول نه دی او ویلي یې دي چې دغه ویروس ښایي له نورو اسیایي هېوادونو او په غالب ګومان په سمندري کنګل شوېو خوړو کې دې هېواد ته لیږدیدلی وي.