د نورستان خلک او طالب چارواکي: هېچا ته اجازه نه ورکوو چې ځنګلونه پرې کړي
د پارون قومي شورا مشر مولوي کریم الله وايي، له لسګونو کالو را په دېخوا يې د خپلې سېمې ځنګلونه د تړو او ناغو په وسېله له پرې کولو ساتلي دي او په وینا یې د لرګیو مافیا او قاچاق وړونکو ته يې وخت نه دی ورکړی چې د نورو ولایتونو په څېر د نورستان پر ځنګلونو تالان جوړ کړي.
کریم الله زیاتوي: "تر اوسه د قومي تړو او ناغو په وسیله قومونه دغه ځنګل ساتلی دی. پخواني حکومت هم موږ سره پرېکړه کړې وه چې ځنګل به په شرېکه ساتو. اوس مو له اسلامي امارت غوښتنه ده چې موږ سره د ځنګل په ساتنه کې مرسته وکړي."
خلک له طالب مشرانو غواړي چې په راتلونکي کې قومي شورا ګانو او ولسونو سره د ځنګلونو په ساتلو کې همکار شي.
د نورستان مرکز او ولسوالیو کې د نښترو ترڅنګ د ځڼغوزیو، غوزاڼو او نورو میوو زیات ځنګلونه شته چې د سېمې خلک ترې هرکال یو څه عواید ترلاسه کوي او په همدې عوایدو خپل ژوند تېروي.
په نورستان کې چارواکي هم وايي چې د ځنګلونو ساتلو کې ولسونو سره یوه خوله دي.
ټولو ولسوالیو او امنیه قوماندانیو پورې اړوندو امنیتي پوستو ته یې امر کړی چې د ځنګل وهونکو او د لرګیو د قاچاق وړونکو مخه ونیسي.
د نورستان د مطبوعاتو مسول مولوي سمیع الحق ازادي راډیو ته وویل: "نورستان ټول هېواد کې د قدرتې ښکلا په درلودلو شهرت لري. د نړۍ په کچه د ښکلو سېمو کتار کې راځي. دا ښکلا د نورستان په غرونو کې د شنو او دنګونو موجودیت رامنځته کړې ده. د ځنګل ساتلو کار کې د نورستان چارواکي د ولسونو سره همغږي دي او هېچا ته به اجازه ور نه کړي چې ځنګلونه ووهي او قاچاق يې کړي."
نورستان هغه غرنی او لېرې پروت ولایت دی چې ډېری غرونه يې د نښترو په دنګو او نورو ونو زرغون دي.
په خوړونو کې رڼې اوبه بهېږي او په ځمکه يې شنو بخملینو چمنونو ښکلا نوره هم زیاته کړې چې د پخوانیو چارواکو په وینا چې د ۱۴۰۰لمریز کال په څه باندې څلورو میاشتو کې ورته نږدې سل زره سیالانیان ورغلي او د نورستان له ښکلاګانو يې خوند اخیستی.
که څه هم چې د پخواني ولسمشر محمد اشرف غني له خوا نورستان د ملي پارک په نوم ونومول شو، خو ملي پارک ته د سیالانیانو د تګ لپاره نه سړکونه جوړ شول او نه هم داسې هوټلونه او تم ځایونه جوړ شول چې هلته سیالانیان په کې شپې تېرې کړي.