شېرپور کې توغندی لګېدلی؛ کابل ښاریان د امنیتي پېښو زیاتوالي اندېښمن کړي
د طالبانو حکومت د کورنیو چارو وزارت د کابل ښار شېرپور سیمه کې د توغندي د لګېدو خبره کوي.
د طالبانو د حکومت د کورنیو چارو وزارت تاییدوي، چې نن یکشنبه سهار د کابل ښار په شېرپور سیمه کې پر یوه کور توغندی لګېدلی دی.
د دغه وزارت ویاند عبدالنافع ټکور په دې اړه ازادي راډیو ته په یو لیکي پیغام کې ویلي: "د کابل ښار شېرپور کې په یو کور باندې راکټ لګېدلی دی کوم تلفات نه لري، کور خالي و، څوک په کې نه وو."
بلخوا ځینې عیني شاهدان او د سیمې اوسېدونکي د کابل ښار په بله سیمه دهمزنګ په څلور لاره کې هم د یوې چاودنې خبره کوي، خو د دوی په خبره د دې لپاره چې چاودنه سهار مهال شوې او پر سړک څوک نه وو، دا چاودنه هم ممکن تلفات ونه لري.
د طالبانو د حکومت د کورنیو چارو وزارت د دې پېښې په اړه څه ونه ویل.
دا په داسې حال کې ده، چې تر دې مخګې د جولای په ۲۹مه هم د کابل کرکټ نړیوال لوبغالي کې، د شپږیزې لیګ د یوې سیالۍ په جریان کې هم چاودنه وشوه.
د رسمي شمېرو له مخې په دې چاودنه کې دوه تنه وژل شوي او دولس نور ټپیان شوي دي.
خو د ملګرو ملتونو سرمنشي انټونیو ګوټریش، افغانستان لپاره د ملګرو ملتونو د سرمنشي د ځانګړي استازي مرستیال او د بشري مرستو همغږي کوونکی رمیز الکبروف او په کابل کې د پاکستان سفیر منصور احمد خان په بېلابېلو ټویټونو کې د کرکټ په لوبغالي کې د وژل شویو شمېر ۱۹ کسان یاد کړي وه، خو ښاغلي ګوټریش او منصور احمد خان د طالبانو له لوري د دې خبر تر ردېدو وروسته بېرته خپل ټویټونه پاک کړل.
وروستیو امنیتي پېښو د کابل ښار یو شمېر اوسېدونکي اندېښمن کړي دي.
له دې ډلې د کابل ښار اوسېدونکې نفیسه دانش وايي: "د کابل امنیتي وضعیت مخ خرابېدو دی، حملې کېږي ډلې یې مشخصې نه وي، زموږ اندېښنې شته، دوی طالبان باید خپلې هغه ژمنې عملي کړي کومې یې چې د امنیت د ټینګښت لپاره کړې وې."
د دې ښار بله اوسېدونکې پروانه وايي: "وړاندې هم چاودنې کېدلې اوس هم همدا شان بریدونه او چاودنې کېږي په ځانګړې توګه په جوماتونو او عامه ځایونو کې، نو له دې امله موږ د افغانستان خلک اندېښمن یوو."
طالبانو په وار وار ویلي، چې د خلکو د امنیت د ټينښګت په برخه کې هڅې کوي، خو بیا هم وخت په وخت امنیتي پېښې رامنځته کېږي.
مخکې د طالبانو حکومت د کورنیو چارو وزارت ویلي و، چې په کابل کې د امنیتي پېښو د مخنیوي په موخه کابل ته په ِغځېدلو لارو یې تالاشۍ هم سختې کړي خو لیدل کېږي، چې دې چارې هم کومه ګټه نه ده کړې.