د امریکا پولیس: په لاس انجلس کې د نڅا پر یوه کلب بریدګر ځان هم وژلی
د امریکا په لاس انجلس ښار کې پولیس وایي، د نڅا پر یوه کلب بریدکوونکي ځان هم وژلی دی.
د امریکا په لاس انجلس ښار کې پولیس د هغه برید د انګېزې معلومولو په حال کې دي چې د یکشنبې په شپه د نڅا پر یوه کلب وشو.
په مونته ري ښارګوټي کې شوي دغه برید چینایي الاصله امریکایانو ته اندېښنې پیدا کړي دي.
په لاس انجلس ښار کې د پولیسو یوه چارواکي رابرت لونا د یکشنبې په ورځ رسنیو ته ویلي، بریدګر ۷۲ کلن و او د نڅا پر کلب تر برید وروسته یې پر ځان ډزې کړي دي.
هغه وویل: "یو سپین پوستی سړی د پلورنځي د موټرو پارکېنګ ته ننوت، کله چې د پولیس افسرانو ګزمه د پېښې له ځایه راووته او غوښتل یې بریدګر تعقیب کړي، د یوه موټر له دننه نه د ډزو غږ واورېدل شو. مشکوک کس هوکان تران نومېږي، دوه اویا کلن او اسیایي ټبره دی."
په امریکا کې د چین په ګډون د لرې ختیځ اتباعو ته اسیایي ټبره نوم ورکول کېږي.
د پولیسو په وینا هو کان تران په دې برید کې لس تنه وژلي او لس نور ټپيان ټپيان کړي دي چې د ځینو وضعیت نازک دی.
پولیسو د بریدګر مړی د یکشنې په ورځ له یوه موټره پیدا کړ.
په تېره نږدې یوه میاشت کې دا پنځم ځل دی چې د امریکا په متحده ایالتونو کې د ډزو داسې پیښې رامنځته کېږي.
په تکزاس ایالت کې د تېر کال د مې میاشتې له یوه برید وروسته چې پر ښوونځي وشو او ۲۱ تنه په کې ووژل شول، په لاس انجلس کې د وړمې شپې برید خونړی بلل شوی دی.
تر اوسه معلومه نه ده چې بریدکوونکي په کومه انګېزه د نڅا پر کلب چې چینایانو په کې د خپل نوي کال مراسم نمانځل ډزې کړي دي.
په راپورونو کې راغلي چې مشکوک کس غوښتل تر دې برید وروسته یوه بل ځای کې دویم برید هم وکړي، خو د پولیسو له خوا یې مخه ونیول شوه.