بلوچستان کې ۹ پاکستاني پوليس وژل شوي
پاکستاني رسنیو نن د پولیسو د چارواکو په قول وویل، امنیتي ځواکونه له سبۍ څخه بېرته کوټې ته روان وو چې د موټر په لاره کې یې د کمبیري په پله کې چاودنه وشوه.
د پولیسو یوه چارواکي محمود نوتیزايي بیا ډان ورځپاڼې ته ویلي چې، ګومان کېږي چې یوه انتحاري بریدګر خپل موټرسایکل د امنیتي ځواکونو د سپرلۍ له موټر سره ټکر کړی دی، خو ده په عین حال کې وویل چې د پېښې د څرنګوالي په اړه لا ګروېږنې روانې دي.
له دې جلا پرون د خیبر پښتونخوا ایالت په دوو سیمو کې چاودنو لږ تر لږه ۳ تنه ووژل او ۲ نور ژوبل کړل.