د اوکراین د بې پيلوټه الوتکې برید د مسکو ۳ هوایي ډګرونه ځنډني او د روسیې توغندیز برید د اوکراین ۲ ملکیان ووژل
د روسیې تاس دولتي اژانس د خبر له مخې، د دې برید له امله د ماسکو په درېیو اصلي هوایي ډګرونو شیریمیتووا، دیمودیدوا او ونوکوفوا کې الوتنې د دوو ساعتونو لپاره وځنډول شوې.
د ماسکو ښاروال سرګي سوبینین وایي، چې یوه ډرون الوتکه د ماسکو د ایترینسکي په فضا کې نسکوره شوه، دا سیمه د کرملین د لویدیځ په پنځوس کیلومترۍ کې پرته ده.
د بې پيلوټه الوتکې دا برید یوه ورځ وروسته تر دې وشو، چې د روسیې له لورې د کریمیا اشغال شوې ټاپوزمه په ګډون د روسیې دننه د بې پیلوټه الوتکو بریدونه وشول.
د روسیې دفاع وزارت پرون په یوه بیان کې وویل، چې د څلرویشت ساعتونو په ترڅ کې یې درې اویا ډرون الوتکې له منځه وړې دي، چې له دې ډلې یې دوه څلویښت د کریمیا ټاپوزمه پر سر ویشتلې دي.
بل لور ته: د روسیي ځواکونو د ډزو له امله نن د اوکراین په ختیځ کې دوه ملکیان ووژل شول.
د خارکیف والي اوولې سینهوبوف وویل، چې دا دوه تنه د پودولي په کلي کې چې د خارکییف ختیځ ته پروت دی په یوه کافي شاپ کې وژل شوي دي.
وروسته تر دې، چې روسیې د دوه زره دوه ویشتم کال په فبروري کې په ټول اوکراین برید وکړ د پودولي کلی یې ونیو او دا سیمه په سپتمبر کې بیرته اوکرایني ځواکونو ونیوله.
روسیي ځواکونو په وروستیو اونیو کې د خارکیف د لومړۍ کرښې د ماتولو هڅې زیاتې کړې دي. اوکرایني ځواکونه وایي چې جګړه سخته شوې ده خو لاهم دوی توانیدلي دي چې لومړۍ کرښه ټینګه کړي.