د خیبر پښتونخوا حکومت په کاټلنګ کې د ډرون برید قربانيانو ته پيسې ورکړې دي
د خیبر پښتونخوا حکومت وايي پر هغو کورنيو یې پيسې وویشلې چې د مارچ پر ۲۸مه، د مردان په کاټلنګ کې د پاکستاني پوځ په ډرون برید کې یې غړي وژل شوي وو.د خیبرپښتونخوا صوبايي وزير ډاکټر امجد علي پر خپله اېکس پاڼه ليکلي چې د مې په ۲۴مه یې، د هر يو وژل شوي کس کورنۍ ته پنځوس لاکه روپۍ ورکړي. د هغه په وينا د ګوجر قام سره تعلق لرونکيو ۹ کسانو په وژل کېدو خواشينی دی.
نوموړي د پیسو د چيکونو د ويشلو په وخت هغو خلکو ته د وينا په وخت وويل: "له یوې خوا ریاستي ادارو تاسو ووژلئ او بلې خوا یې پر تاسو تور پورې کړ چې ترهګر یاست. دوی وويل چې ترهګر مو وژلي دي. تاسو د دې ځای اصلي اوسېدونکي او محب وطن خلک یاست." امجد علي پر امنيتي ادارو تور پورې کړ چې "د خیبرپښتونخوا د خلکو استحصال کوي" نو ځکه "په خلکو کې د هغوی په وړاندې نفرت مخ په زیاتېدو دی".
د یادونې ده چې د کاټلنګ خلکو د مارچ پر ۲۹مه مشال راډیو ته وویل چې د مارچ پر ۲۸مه، د پاکستان امنيتي ځواکونو د عملياتو په وخت په ډرون بریدونو کې ۹ کسان ووژل. د ځايي خلکو په وينا هغه عمليات د بابوزو په غرونو کې شوي چې د شپونکيانو کورنۍ پکې په نښه شوې دي.
تر هغه وروسته د پاکستان پوځ څه نه وو ويلي خو د اطلاعاتو وفاقي وزير عطاالله تارړ او د وزيراعظم شهباز شريف سلاکار، رانا ثناالله رسنيوو سره په خبرو کې دعوه وکړه چې په عملياتو کې ترهګر وژل شوي دي. هغوی زياته کړې وه چې په وژل شويو کې د وسله والو دوه قوماندان هم دي.
خو خلکو په سوات او د خيبرپښتونخوا د اسمبلۍ غړيو په خپل ويناوو کې دا ادعاوې رد کړي. دوی وويل چې وفاقي حکومت دې نه یوازې ولسي وګړيو ته د ترهګرو په خطاب کولو سره بخښنه وغواړي بلکې په راتلونکي کې دې داسې پېښې نه تکراروي. تر اوسه وفاقي حکومت د هغو غوښتنو په اړه څه نه دي ويلي.
د مارچ پر ۳۰مه د سوات په بریکوټ کې د وژل شویو د جنازې پر مهال هم ځايي خلکو مظاهره کړې وه. ډاکتر امجد علي د جنازې پر وخت مشال راډیو ته ویلي ول چې حکومت د پېښې مقدمه دایره کړې او د وژل شویو کورنیو ته تاوان ورکوي. پر هم هغه ورځ د پاکستان د بشري حقونو کمېشن هم له وفاقي او صوبايي حکومتونو د پېښې "د بې پرې او رڼو پلټنو" غوښتنه کړې وه.
ډاکتر امجد علي هغه مهال هم ویلي چې وژل شوي کسان ترهګر نه بلکې د شپنو د کورنۍ غړي ول. هغه د مې په ۲۴مه، د پېښې قربانيانو ته د پیسو تر ورکولو وروسته وويل: "ریاست سره چې نورې خبرې ختمې شي نو يا پر خلکو د غدار ټاپې لګوي او يا د ترهګرو." د پاکستان وفاقي حکومت او ریاستي امنيتي ادارو په دې اړه څه غبرګون نه دی ښوولی.