د میرلي مشران وايي دوه نور ماشومان په تازه ډرون برید کې ژوبل شوي
د میرلي خلکو د جون پر ۱۰مه د مشال راډیو له لارې له حکومته غوښتنه وکړه چې په خپله ژمنه دې ولاړ پاتې شي او ډرون بریدونه دې پرې بند کړي. دوی دا غوښتنه وروسته له هغې کړې ده چې د جون پر اتمه یو وارې بیا د دوی په وینا په یو ډرون برید کې دوه ماشومان ژوبل شوي دي.
د سیمې مشران وايي د وسلوالو او پوځ ترمینځ د جګړې پر مهال د کور مېرمنې او ماشومان یې هم خوندي نه دي او د ډرون او د توغندیو په بریدونو کې په پرله پسې ډول ولسي کسان، په تېره بیا ماشومان په نخښه کېږي.
انتظامیې او پوځ تازه د میرلي د خلکو د غوښتنو په اړه څه نه دي ویلي خو د مې پر ۲۶مه پوځ او انتظامیې د شمالي وزیرستان مشرانو ته باور ورکړی وو چې د وسلوالو خلاف د عملیاتو پر مهال به د ولسي خلکو خوندیتوب ته پام کوي.