Mbi 5 milionë të infektuar nga koronavirusi në Indi
Ky është numri i më lartë pas Shteteve të Bashkuara. Virusi duket se po përhapet shumë më shpejt në Indi se në çdo vend tjetër.
Ministria e Shëndetësisë e Indisë raportoi 90.123 raste të reja në 24 orët e kaluara, duke rritur totalin në 5.020.359.
Më shumë se 80.000 njerëz kanë vdekur, derisa raportohet për mungesë të shtretërve në kujdesin intensiv dhe furnizimeve me oksigjen.
Rritja e numrit të të infektuarve vjen derisa qeveria po vazhdon të heqë kufizimet në të gjithë vendin në përpjekje për të ringjallur ekonominë. Miliona persona kanë humbur vendet e punës që nga muaji mars.
Së fundi, palestrat janë bizneset që do të rihapen, ndërsa shkollat, kolegjet dhe sallat e kinemasë mbeten të mbyllura. Por, shumica e vendeve të punës dhe tregjeve janë kthyer në normalitet, dhe shumë qytete po lejojnë restorantet dhe baret të rifillojnë shërbimet.
Numri i përgjithshëm në të gjithë botën i rasteve të konfirmuara me koronavirus është 29.4 milionë, sipas një llogaritje nga Universiteti Johns Hopkins, me seli në SHBA.