IKSHPK: Pesë të vdekur dhe 282 raste të reja me koronavirus
Viktimat janë nga: Gjilani, Lipjani, Prishtina, Prizreni dhe Shtimja.
Në raportin ditor për situatën epidemiologjike thuhet se janë regjistruar edhe 282 raste të reja me koronavirus.
Nga sëmundja janë shëruar edhe 184 pacientë ndërsa raste aktive janë 6.376.
Që nga muaji mars i vitit 2020, deri më 01 shkurt 2021, në Kosovë janë regjistruar 60.500 raste me koronavirus, prej të cilave 52.621 janë shëruar ndërsa 1.503 kanë vdekur.
Të hënën, ministri në detyrë i Shëndetësisë, Armend Zemaj, ka thënë se vaksinat kundër koronavirusit do të arrijnë në Kosovë gjatë këtij muaji.
Sipas tij, procesi i përgatitjes për ardhje të vaksinave ka përfunduar, që nënkupton planin e imunizimit dhe sigurimin e zinxhirit të ftohjes.
“Tash jemi në pritje të ardhjes së vaksinave. Gjatë muajit shkurt, vaksina anti-COVID do të jetë në Kosovë. Përgatitjet janë më intensive në qendrat e mjekësisë familjare”, ka thënë Zemaj, pa përmendur ndonjë datë të saktë se kur mund të ndodhë një gjë e tillë.
Ai ka paralajmëruar edhe nisjen e fushatave vetëdijësuese, sepse siç ka thënë Zemaj ky proces ka tendencë të përballet me teori të konspiracionit në Kosovë, si edhe në shumë vende tjera të botës.