Boris Johnson dorëhiqet pasi konstatohet se mashtroi Parlamentin britanik
Johnson dha dorëheqjen pasi mori rezultatet e një hetimi nga ligjvënësit për deklaratat mashtruese që ai bëri në Parlament për një seri ndejash qeveritare që thyen rregullat gjatë pandemisë së COVID-19, kohë kur ai ishte në pushtet.
Në një deklaratë të gjatë dorëheqjeje, Johnson akuzoi kundërshtarët se po përpiqeshin ta dëbonin atë dhe la të kuptohej se karriera e tij politike mund të mos ketë përfunduar ende.
“Është shumë e trishtueshme që po largohem nga Parlamenti, të paktën tani për tani”, tha ai.
Johnson, 58 vjeç, tha se kishte "marrë një letër nga Komiteti i Privilegjeve duke e bërë të qartë - për habinë time - se ata janë të vendosur të përdorin procedurat kundër meje për të më dëbuar nga Parlamenti", shtoi Johnson në letrën e tij.
Ai e quajti komitetin që e hetonte atë, i cili ka anëtarë si nga qeveria ashtu edhe nga partitë opozitare, një "gjykatë kanguri".
“Qëllimi i tyre që nga fillimi ka qenë të më shpallin fajtor, pavarësisht nga faktet”, tha Johnson, raporton “Washington Post”.
Dorëheqja do të shkaktojë zgjedhje speciale për të zëvendësuar Johnson si ligjvënës për një vend në periferi të Londrës në Dhomën e Komunave.
Johnson, karriera e të cilit ka parë një sërë skandalesh dhe rikthimesh, i çoi konservatorët në një fitore të rëndësishme në vitin 2019 por ai u detyrua të largohej nga pozita më pak se tre vjet më vonë.
Ai kishte qenë në pritje të rezultatit të një hetimi nga një komitet i standardeve të Dhomës së Komunave për deklaratat mashtruese që ai bëri në Parlament për një mori tubimesh në ndërtesat qeveritare në vitet 2020 dhe 2021 që shkelën rregullat e izolimit.