Përleshje në Kuvend të Kosovës mes PDK-së dhe LVV-së
Në Kuvendin e Kosovës, deputetët e Partisë Demokratike të Kosovës (PDK) kanë sulmuar fizikisht kryeministrin Albin Kurti dhe pjesëtarë tjerë të Qeverisë.
Kurti ishte duke folur për situatën në veri të Kosovës, kur fjalimi i tij u ndërpre nga deputetët e opozitës që brohorisnin "rrenc".
Fillimisht, në drejtim të zëvendëskryeministrit Besnik Bislimi u hodh ujë nga deputeti Mërgim Lushtaku, pasi Bislimi largoi dhe grisi nga foltorja një foto-montazhë të kryeministrit me hundë të zgjatur që opozita ia kishte vendosur aty.
Më pas, situata u agravua me sulme fizike edhe me ministrin e Financave, Hekuran Murati.
Mbrojtja e afërt e kryeministrit ka intervenuar për të ndaluar përleshjet. Aktualisht, ata ndodhen brenda në sallën e Kuvendit.
Nga Partia Demokratike e Kosovës është kërkuar që kryeministri të mos flasë në Kuvend dhe janë pozicionuar pranë foltores, kurse kryeministri nuk është duke u larguar nga foltorja, me synimin për të vazhduar fjalimin e tij.
Para se të sulmohej, Kurti në Kuvend foli për Radoiçiqin, dhe se si është tërhequr fletarrestimi ndaj tij në vitin 2021, disa dite para se të formohej qeveria e tij.
"Kur kanë qenë qeveritë e mëhershme, ky kryekriminel ka qenë në Mitrovicë, ka qenë në Prishtinë. Tash, kontributi ynë, është që është në një hotel në Kopaonik, në Serbi".
Opozita ditëve të fundit, sikurse edhe në këtë seancë, ka qenë kritikuese ndaj pushtetit pasi në mediat në Kosovë kanë dalë pergjime të shefes së grupit parlamentar të Lëvizjes Vetëvendoje, Mimoza Kusari-Lila, ku ajo ka pranuar që ka zhvilluar një bisedë me nënkryetarin e Listes Serbe, Milan Radoiçiq.
Lëvizja Vetëvendosje ka qenë kritike e vazhdueshme ndaj persove që kanë mbajtur kontakte me Radoiçiqin.
Milan Radoiçiq është nënkryetari i Listës Serbe, i cili kërkohet nga autoritetet e Kosovës dhe është gjithashtu në listën e zezë të SHBA-së për “përfshirje në krimin e organizuar ndërkombëtar”.
Ai po ashtu kërkohet nga Kosova për dyshimet se është përfshirë në frikësimin e dëshmitarëve në rastin gjyqësor, të njohur si "Brezovica".
Radoiçiq po ashtu përmendet në aktakuzë si “udhëheqës të grupit kriminal”, i cili planifikoi vrasjen e politikanit serb Oliver Ivanoviq. Megjithatë, urdhërarresti për Milan Radoiçiqin u tërhoq në mars të vitit 2021 pa asnjë shpjegim.
*Ky lajm është duke u përditësuar...