Posta nis shpërndarjen e gjobave digjitale për shkeljet në trafik

Posta e Kosovës bëri të ditur se ka nisur shpërndarjen e gjobave digjitale për shkeljet e trafikut. Kjo nismë, sipas Postës, do të rrisë sigurinë dhe përgjegjësinë në vend.

“Ky hap modernizues e bën procesin më të shpejtë dhe më të thjeshtë për qytetarët, duke siguruar një menaxhim efikas të detyrimeve të tyre. Gjobat dërgohen drejtpërdrejt në adresat e qytetarëve, duke ofruar një mundësi më të përshtatshme dhe më të thjeshtë për të realizuar pagesat”, u tha në njoftim.

Në fillim të prillit, Policia e Kosovës bëri të ditur se do të nisë dërgimin e gjobave të trafikut në adresë të pronarëve të automjeteve që identifikohen se kanë bërë kundërvajtje.

Policia tha se gjobat për shkeljet në trafik – që do të identifikohen përmes pajisjeve inteligjente – do t’iu dërgohen pronarëve të automjeteve përmes Postës së Kosovës dhe platformës e-Kosova.

Sipas Policisë, përmes pajisjeve inteligjente identifikohen shkeljet në trafik sikurse tejkalimi i shpejtësisë, skadimi i afatit të regjistrimit, tejkalimi në vende të ndaluara, mosrespektimi i semaforit, mosvendosja e rripit, përdorimi i telefonit mobil e kundërvajtje të tjera.

Pas verifikimit të pronarit të automjetit, policia e regjistron dhe e printon dëshminë e kundërvatjes. Të dhënat futen në sistem, e më pas gjoba vendoset në zarf e dorëzohet në shërbimin postar, për t’iu dërguar më pas pronarit të automjetit.

Qytetarët mund të paraqesin ankesë për gjobën e pranuar. Atyre po ashtu iu mundësohet që të paguajnë gjobën për kundërvajtje në çdo zyre postare të Postës së Kosovës.