Abdixhiku: LDK-ja do të shkojë në Kuvend të enjten për seancën konstituive   

Kryetari i Lidhjes Demokratike të Kosovës, Lumir Abdixhiku, tha se deputetët e partisë së tij do të shkojnë në Kuvend të enjten, më 17 prill, për vazhdimin e seancës konstituive.

Seanca për konstituimin e legjislaturës së nëntë, të dalë nga zgjedhjet e 9 shkurtit, u ndërpre pas afër 2 orësh punime të martën, pasi deputetët nuk e miratuan raportin e Komisionit të përkohshëm për verifikimin e mandateve dhe kuorumit.

Rregullorja e Kuvendit të Kosovës thekson se në rast se seanca për konstituimin e legjislativit ndërpritet, ndërprerjet “nuk mund të jenë më të gjata se 48 orë”.

“Seanca konstituive e Kuvendit të Republikës duhet të mbahet e të thirret më së largu çdo 48 orë. Nesër, nga ora 10:00, siç e parasheh Rregullorja e Kuvendit të Kosovës, deputetët e LDK-së do të jenë prezentë në seancën që duhet të ndodhë”, shkroi Abdixhiku në Facebook.

Deputetët e LDK-së, së bashku me ata të Partisë Demokratike të Kosovës dhe Aleancës për Ardhmërinë e Kosovës votuan kundër raportit, duke thënë se anëtarët e Qeverisë, që janë zgjedhur deputetë, është dashur që të japin dorëheqje zyrtarisht më herët, në mënyrë që të mund të betohen si deputetë të përbërjes së re parlamentare.

Por, kryeministri në detyrë, Albin Kurti, ka argumentuar se Qeveria aktuale është e dorëhequr apo në detyrë, për shkak se e ka përmbyllur mandatin e saj të rregullt katërvjeçar më 23 mars.

Ai më 15 prill po ashtu i dërgoi një letër Kuvendit, duke e njoftuar për dorëheqjen nga posti ekzekutiv, me qëllim që të mund të betohet si deputet. Por, PDK, LDK dhe AAK thanë se Kurti dhe anëtarët e tjerë të ekzekutivit duhet të ofrojnë dorëheqje formale.

“LDK-ja i fton të gjithë deputetët e certifikuar dhe të gjitha partitë parlamentare, të jenë prezent në këtë seancë”, tha Abdixhiku, duke përsëritur kërkesën e tij drejtuar anëtarëve të Qeverisë që të japin dorëheqje.

“Ftojmë kabinetin qeveritar, që pretendojnë se janë dorëhequr por ende, dhe paradoksalisht, mbajnë mbledhje qeveritare dhe marrin vendime, të dorëhiqen dhe këto dorëheqje t’i deponojnë te organet e Kuvendit të Kosovës”, tha ai.

Më herët gjatë ditës, Kurti gjatë mbledhjes së Qeverisë tha se ekzekutivi është në detyrë deri në zgjedhjen e një qeverie të re. Ai tha se ligjet dhe Kushtetuta ia mundësojnë Qeverisë të vazhdojë detyrën, por me kompetenca të kufizuara.

Kërkesën drejtuar për dorëheqje, Kurti e konsideroi së “të pamatur” dhe tha se rrezikon krijimin e një vakumi institucional.

Kurti po ashtu tha se është partia e tij, si fituese e zgjedhjeve është e interesuar që sa më shpejt të formojë institucionet e reja.

LVV-ja më herët është deklaruar kundër një bashkëpunimi me një nga partitë shqiptare, por së voni e ka pranuar se nuk mund ta bëjë Qeverinë vetëm me pakicat joserbe.

Partitë e mëdha shqiptare janë shprehur kundër bashkëpunimit me LVV-në, por Nisma Socialdemokrate – që ka fituar tre deputetë – nuk ka vendosur vija të kuqe për asnjë parti, ndonëse ka thënë se ende nuk ka një marrëveshje me partinë e Kurtit.