Рақибони паҳлавонони тоҷик дар "Baku Grand Slam" маълум шуданд
Ба иттилои Федератсияи байналмилалии ҷудо (IJF), барои иштирок дар ин мусобиқот то ҳоло 446 варзишгар (264 мард ва 182 зан) аз 61 кишвари панҷ қораи олам номнавис шудаанд.
Тоҷикистонро дар ин мусобиқот ҳашт варзишгар дар рақобатҳо миёни мардҳо намояндагӣ мекунад:
-60 кг – Муҳаммадсолеҳ Қувватов
-66 кг – Эмомалӣ Нуралӣ
-73 кг – Маҳмадшариф Наҷмиддинов
-81 кг – Шодмон Ризоев
-90 кг – Ҷаҳонгир Маҷидов
-100 кг – Эмомризо Анварзода
+100 кг – Мансур Раҳмон
+100 кг – Шакар Мирмамадов
Аз рӯи натоиҷи қуръакашӣ дар рӯзи аввали мусобиқот - 22-юми сентябр - Муҳаммадсолеҳ Қувватов (-60 кг) дар даври аввал бо Йелдос Сметов аз Қазоқистон ва Эмомалии Нуралӣ (-66 кг) бо Страҳинҷа Бунчич аз Сербистон рақобат мекунанд.
Рӯзи 23-юми сентябр Маҳмадшариф Наҷмиддинов (-73 кг) дар даври аввал бо Жансай Смагулов аз Қазоқистон ва Шодмон Ризоев (-81 кг) дар даври дувум бо Лачлан Мурҳид аз Британияи Кабир вориди рақобат мешаванд.
Дар рӯзи охирини мусобиқот – 24-уми сентябр - Ҷаҳонгир Маҷидов (-90 кг) дар даври дувум бо ғолиби ҷуфти Владимир Ахалкатси аз Гурҷистон ва Даниел Нието аз Испания, Эмомризо Анварзода (-100 кг) дар даври аввал бо Иссаан Беззина аз Малта, Шакармамад Мирмамадов (+100 кг) дар даври аввал бо Мариус Физел аз Словакия ва Мансур Раҳмон (+100 кг) дар даври аввал бо Хориучи Филип аз Амрико ба рақобат мепардозанд.
Маблағи умумии ҷоизаҳои молӣ 154 000 евроро ташкил медиҳад. Ғолибон дар ҳар як вазн (7 вазн миёни мардон ва 7 вазн миёни занон) 5000 евро, барандагони медали нуқра 3000 евро ва нишони биринҷӣ 1500 евро ҷоизапулӣ дарёфт мекунанд.
Ҳамзамон дастаи мунтахаби Тоҷикистон дар ҳайати 11 варзишгар (7 мард ва 4 зан) барои ширкат дар мусобиқоти ҷудо аз рӯи барномаи Бозиҳои XIX Осиё, ки рӯзҳои 24-27-уми сентябр дар шаҳри Ҳангжоуи Чин баргузор мешавад, омодагӣ мебинад.
Тоҷикистонро дар мусобиқаи мардон ҳафт нафар - Меҳрзод Сӯфиев (-60 кг), Обид Ҷебов (-66 кг), Беҳрӯзи Хоҷазода (-73 кг), Сомон Маҳмадбеков (-81 кг), Комроншоҳ Устопириён (-90 кг), Исроил Раҳимов (-100 кг) ва Темур Раҳимов (+100 кг) - намояндагӣ хоҳанд кард.
Дар мусобиқаи занон чаҳор нафар – Мадина Қурбонзода (-48 кг), Аҳлия Муъминова (-52 кг), Фазилат Гулбоева (-57 кг) ва Мавлуда Одинаева (-63 кг) – ҳунарнамоӣ мекунанд.
Ба иттилои Кумитаи миллии олимпии Тоҷикистон, дар Бозиҳои XIX осиёӣ, ки аз 23-юми сентябр то 8-уми октябр дар шаҳри Ҳангжоуи Чин доир мегардад, Тоҷикистонро беш аз 100 варзишгар намояндагӣ хоҳад кард.
Ба барномаи бозиҳо 40 навъи варзиш (28 намуди олимпӣ ва 12 намуди ғайриолимпӣ) дохил аст. Варзишгарони тоҷик ба ҷуз аз ҷудо, дар риштаҳои бокс, варзиши сабук, куштии озод ва юнонию румӣ, вазнабардорӣ, ҷиу- ҷитсу, шиноварӣ, камонварӣ, тирандозӣ, таэквондо, каратэ, кураш ва ғайра ҳунарнамоӣ хоҳанд кард.