ВКД Русия гуфт, ҷинояткории хориҷиҳо 15% афзудааст
ВКД Русия гуфт, ҷиноятҳои аз ҷониби хориҷиҳо содиршуда дар ин кишвар дар чормоҳаи аввали соли 2025 дар қиёс бо соли гузашта 15,3% афзуда, ҳар ҷинояти шашумро аз миёни хориҷиҳо шаҳвандони Тоҷикистон содир кардаанд.
Виталий Яковлев, муовини сардори сарраёсати умури муҳоҷирати ВКД Русия дар як ҳамоише дар шаҳри Ашқобод 12 июн гуфт, “мутаассифона, мо раванди манфии афзоиши шумори ҳодисаҳои ҷиноии содиршаванда аз ҷониби муҳоҷиронро мушоҳида мекунам. Аз ҷумла, шумори ҷиноятҳое, ки аз ҷониби хориҷиҳо содир шудааст, то 15,3% афзудааст.
Ба ифодаи рақам, дар чормоҳаи аввали соли ҷорӣ хориҷиҳо дар Русия 12,5 ҳазор ҷиноят содир кардаанд”, гуфт Яковлев дар конфронсе бо иштироки мақомоти муҳоҷирати кишварҳои Қазоқистон, Русия, Эрон, Узбекистон, Тоҷикистон, Туркманистон. Яковлев гуфтааст, соли ҷорӣ аксар ҷиноятҳоро шаҳрвандони Узбекистон (35,5% аз шумори умумии ҷиноятҳои миёни хориҷиҳо), Тоҷикистон (16,6%) ва Қирғизистон (11,5%) содир кардаанд. Маълум нест, манзур кадом навъи ҷиноятҳо аст.
Моҳе пеш раиси Кумитаи тафтишоти Русия Александр Бастрыкин дар як ҳамоише дар Петербург гуфт, дар миёни муҳоҷирон ҷиноятҳои вобаста ба муомилаи ғайриқонунӣ бо маводи мухаддир ва амалҳои террористӣ рӯ ба афзоиш овардааст. Тасдиқи дурустии ин изҳорот тавассути манбаъҳои мустақил имкон надорад. Вале дар бисёр ҳолатҳо муҳоҷирон аз мавриди тӯҳмат қарор гирифтанашон аз ҷониби ходимони ҳифзи қонуни Русия ҳам хабар додаанд.
Изҳороти мақомоти ҳифзи қонуни Русия, ки дар як соли охир бахсус зидди муҳоҷирони корӣ бо шеваи бераҳмона амал мекунанд, дар ҳоле садо медиҳад, ки Сергей Шойгу, дабири шӯрои амнияти Русия поёни моҳи апрел гуфт, дар Русия шумори хориҷиҳо зиёд шудааст, вале шумори ҷиноятҳое, ки онҳо содир кардаанд, дар сатҳи пешина, яъне 2% аз омори умумии ҷинояткорӣ дар саросари кишвар боқӣ мемонад.
Шойгу гуфт, соли 2024 дар Русия 6,3 ва соли 2023 дар ин кишвар 5,9 миллион шаҳрванди хориҷӣ қарор доштанд. “Шумори ҷиноятҳои аз ҷониби онҳо содиршуда амалан тағйир наёфтааст ва 38,6 ҳазор ҳолатро ташкил додааст”.
Дар Русия бахусус баъди ҳамла ба толори консертии “Крокус”, ки дар содир кардани он асосан шаҳрвандони Тоҷикистон гумонбар дониста мешаванд, мақомот мубориза бо муҳоҷирати ғайриқонуниро шиддат бахшиданд. Дар ин кишвар даҳҳо қонуни нави маҳдудкунандаи кор ва ҳузури шаҳрвандони хориҷӣ қабул шуд. Айни замон, дар матбуоти маҳаллӣ тарғиботи зидди муҳоҷирон ҳамаҷониба идома дорад.