"Гурӯҳи 24" ҳодисаи Боздоштгоҳи Хуҷандро маҳкум кард
Як ҷунбиши мухолифи ҳукумати Тоҷикистон дар хориҷа ҳодисаи Боздоштгоҳи Хуҷандро маҳкум кард. Дар ин воқеа, ки рӯзи 31-уми январ иттифоқ уфтода, вале мақомот на хабари расмияшро доданд ва на ҷузъиёташро бармало карданд, ба иттилои манобеи Радиои Озодӣ, се зиндонӣ кушта шудаанд.
"Гурӯҳи 24" (Фаъолияташ дар ҳудуди Тоҷикистон мамнуъст) рӯзи 4-уми феврал дар изҳороте аз сенарияи ба гуфтааш такрорӣ дар зиндонҳои кишвар ибрози нигаронии ҷиддӣ кардааст.
"Дар солҳои охир, ҳар боре вазъияти сиёсӣ ва иҷтимоӣ дар кишвар муташанниҷ мегардад, мақомоти расмӣ аз рух додани "ошӯб" дар зиндонҳо хабар медиҳанд," -- гуфта шудааст дар изҳорот. Дар ҳоле ки, ба гуфтаи масъулони "Гурӯҳи 24", "ин ҳама бе таҳқиқоти мустақил, бидуни шаффофият ва бидуни иҷозати назорати ҷомеа сурат мегирад… Ин сенария метавонад барои аз байн бурдани садоҳои норозӣ, маҳбусони сиёсӣ ё шоҳидоне бошад, ки қобилияти расонидани ҳақиқатро ба ҷомеа доранд."
Созмони мухолифи ҳукумат бовар дорад, "хомӯшии ҷомеаи байнулмилалӣ ва набудани фишори ҷиддӣ ба режими ҳоким боис мегардад, ки ин давраи зӯроварӣ идома ёбад."
Манобеи Радиои Озодӣ рӯзи 3-юми феврал хабар доданд, ки дар як тирпаронӣ дар Боздоштгоҳи шаҳри Хуҷанд камаш се зиндонӣ ва як нигаҳбон кушта шудаанд. Дертар як манбаи наздик ба Идораи тандурустӣ дар вилояти Суғд бо шарти фош нашудани ному мақомаш гуфт, "аз боздоштгоҳ се маҳбуси кушташуда ва як захмиро оварданд." Вай дар бораи нигаҳбон чизе нагуфт.
Ба гузориши манбаъҳои Радиои Озодӣ, воқеа замоне рӯй додааст, ки “ҳашт маҳбус баъди тир задан ба як нигаҳбони Боздоштгоҳ бо нияти фирор ба нуқтаи ҳоил ворид гаштаанд”. “Нигаҳбонҳои дигар ба тарафи онҳо тир задаанд. Агар онҳо аз нуқтаи ҳоил мегузаштанд, дигар як дарвозаи баромад буд ва метавонистанд гурезанд,” – гуфт яке аз манбаъҳо.
Бо гузашти бештар аз як ҳафта аз ҳодиса Идораи зиндонҳои Вазорати адлия дар ин бора хабаре надодааст.
Ангезаи ҳамла дар Боздоштгоҳи Хуҷанд рӯшан нест. Маълум нест, ин ҳодиса тарҳи ошӯб будааст ё тавре намояндагони мухолифони ҳукумат дар хориҷа таъкид мекунанд, баъзе аз зиндониён аз вазъи боздоштгоҳ ва тарзи муносибат бо онҳо “ба дод омадаанд”.
Дар Тоҷикистон 19 боздоштгоҳ ва зиндон ҳаст. Мақомоти Тоҷикистон дар суҳбатҳои худ аз беҳтар шудани шароити боздоштгоҳу зиндонҳо суҳбат мекунанд. Департаменти давлатӣ ё Вазорати корҳои хориҷии Амрико дар соли 2024 "аз ҳад зиёд будани зиндониҳоро дар маҳбасҳои Тоҷикистон" мушкили ҷиддӣ номид.
Дар солҳои охир дар зиндонҳои Хуҷанд ва Ваҳдат (2018, 2019 ва 2025) чанд ошӯб ё исён рух дода, зиёда аз 50 нафар кушта шуданд. Мақомот ҳамвора ошӯбро кори дасти ифротгароёни исломӣ донистаанд. Ҳомиёни ҳуқуқ бадрафтории мақомот бо маҳбусон, аз ҷумла тамаъҷӯиро аз сабабҳои эҳтимолии ангезандаи исёни маҳбусон ном бурданд.