Türkmenistandan çykmak gadagançylygyna duçar bolan türk raýatynyň aýaly Türkiýedäki maşgalasyna gowuşdy
Türkiýäniň raýtlary bilen durmuş guran we pasportyny çalyşmak üçin Türkmenistana barandan soň ýurtdan çykyp bilmedik türkmenistanly zenanlaryň ýene biri Türkiýedäki maşgalasyna gowuşdy. Azatlyk Radiosy Dilfuza Arslan bilen gürleşip bildi.
Dilfuzanyň 6-njy iýunda Türkiýe barandygyny onuň adamsy Rüstem Arslan Azatlyk Radiosyna şol gün habar berdi.
Bir ýyldan gowrak wagtlap Türkmenistandan çykyp bilmedik Difuza öz başdan geçirenlerini şeýle gürrüň berdi:
“[Maýsa Özkanyň ýoldaşy] Ýylmaz bilen ýoldaşym barada eden reportažyňyzdan üç aý geçenden soň, mart aýynyň 21-ne Daşoguz welaýatynyň Migrasiýa bölümi meni çagyrdy. Ol ýerde bölümiň ýuristi ýanyna çagyryp: ' Seniň işiňde problema bar, başlygyň ýanyna gir' diýip aýdy. Yzy üzülmeýän nobatlar sebäpli başlygyň ýanyna ertesi girip bildim. Bölüm başlygy, maňa kassa baryp 30 manat döwlet pajyny töläp, kagyzyňy al-da, gidiber diýdi. 24-nji martda, Türkmenistanyň migrasiýa hakyndaky kanunynyň 24-nji maddasy esasynda ýurtdan çykmaga rugsat haty berildi” diýip, Dilfuza gürrüň berdi.
Azatlyk Radiosy Türkiýäniň raýatlary bilen durmuş guran daşoguzly Dilfuza Arslanyň we lebaply Maýsa Özkanyň türkmen häkimiýetleriniň olara garşy girizilen ýurduň daşyna çykmak gadagançylygy zerarly maşgalalaryna gowuşyp bilmeýänligi hakynda 2024-nji ýylyň dekabr aýynda habar beripdi.
Dilfuzanyň sözlerine görä, ol migrasiýa gullugyndan rugsatnamany alanyndan soňra, Türkiýäniň wizasyna 3 aý garaşypdyp.
“Iýun aýynda wizam çykdy. Ýoldaşym, gymmat bolsa-da Türk howa ýollarynyň uçaryna 35 müň türk lirasyny [1000 usd] harçlap, maňa bilet aldy. Türkiýäniň wizasyna garaşýan adamlaryň sany gaty kän. Nobatda menden öňde 2000 müň adam bardy” diýip, Dilfuza gürrüň berdi.
Dilfuza Arslanyň sözlerine görä, Maýsa Özkan 2025-nji ýylyň maý aýynda Türkiýä goýberilipdir. Emma Azatlyk Radiosy bu maglumaty Maýsa Özkanyň özünden we onuň adamsyndan tassyklap bilmedi.
Dilfuza Arslan Türkmenistandan Türkiýe uçmaly güni, Aşgabadyň halkara howa menzilindäki ýagdaý barada hem gürrüň berdi:
“Elimdäki rugsatnama we beýleki resminamalarym bilen bardym. Pasport kontroldaky migrasiýa işgäri: 'Näme sebäpden familiýaň Arslanowa däl-de Arslan' diýip, sorady, ýoldaşymyň türkiýelidigini aýdanymdan soň, sesini çykarman pasportyma möhür basyp, 'ýoluňyz açyk bolsun' diýip goýberdi” diýip, Dilfuza goşmaça kynçylyklaryň ýüze çykmanlygyna begenmek bilen gürrüň berdi.
“Meni Migrasiýa gullugyna çagyranlarynda, hiç kim goşmaça soraga çekmedi. Basyş ederler diýip gorkdum, emma hiç zat bolmady, Hudaýa şükür maşgalama gowuşdym” diýip, Dilfuza aýdýar.
Difuzanyň adamsy Rüstem Arslan şu ýylyň başynda Türkiýäniň ýene bir raýaty Ýylmaz Özkan bilen bilelikde Türkmenistanyň hem-de Türkiýäniň prezidentine ýüzlenip, öz aýallarynyň Türkmenistandan çykarylmagyny sorapdy. Şol ýüzlenmede türk raýatlary özleriniňkä meňzeş ýagdaýa düşen ýene onlarça türk raýatynyň topar düzüp, öz aýallaryny Türkmenistandan çykarmak üçin çykalga gözleýändigini habar beripdi.
Türk raýatlaryna durmuşa çykan türkmen zenanlaryna Türkmenistandan çykmaga rugsat berlip, olaryň köpçülikleýin ýurtdan çykyp başlandygyny Azatlygyň çeşmeleri apreliň başynda habar beripdi.
Gadyrly okyjy, siz Telegram we WhatsApp tilsimleriniň messenjerleri arkaly Azatlyk Radiosy bilen howpsuz ýagdaýda habarlaşyp bilersiňiz. Telefon belgileri: +420 724 168 989 we +420 773 797 383.
Türkmenistanda VPN ulgamlary arkaly işleýär. Siz şu meýl: azathabar@derweze.net we sep arkaly biziň mugt Psiphon3 VPN ulgamymyzy Android ulgamlary üçin ýükläp bilersiňiz. Azatlyk Radiosy siziň şahsyýetiňiziň doly gizlinligini kepillendirýär.