QMC Prokuraturası Qırımda yañı yaqalanuvlar boyunca cinaiy işniñ alıp barılmasını başladı
Bildirüvde: «Arizadan belli olğanına köre, qanunsız olaraq meydanğa ketirilgen organlarnıñ vekilleri Qırım Muhtar Cumhuriyetiniñ vaqtınca işğal etilgen territoriyasındaki Bağçasaray şeerinde ve Topçıköy (Dolinnoye) köyünde (Qırım Muhtar Cumhuriyeti) mayıs 21-de, bir gruppa şahıslar olaraq evelden kelişerek, silânı qullanmaq qorqutuvı ile meskenniñ toqunılmazlığı aqqını bozıp, Server Mustafayev ve Edem Smailov yaşağan yerlerinde tintüvler keçirdiler. Daa soñra mezkür şahıslar, «Hizb ut-Tahrir al-İslamiy»niñ faaliyetinde iştirak etüv şübhesi ile yaqalandılar», – denile.
Nezaret etici muessisede, cinayetniñ işlenmesi aqqında ariza ile, Ukrainanıñ Vaqtınca işğal etilgen territoriyalar ve devlet içinde mecburen köçken şahıslarnıñ meseleleri boyunca nazirlik muracaat etti, dep bildirdiler.
Mayıs 21-de Rusiye telükesizlik hadimleri Bağçasarayda «Qırım birdemligi» birleşmesiniñ koordinatorı Server Mustafayev ve Bağçasaray rayonınıñ Topçıköy (Dolinnoye) köyünde Edem Smailovnıñ evlerini tintti.
«Qırım birdemligi» koordinatorı Dilâver Memetovnıñ malümatına köre, Smailov soñki 15 yıl devamında Bağçasarayda musulman diniy merasimleriniñ keçirilmesi ile oğraşa edi.
Rusiye FSBsi, Qırımda «Hizb ut-Tahrir» teşkilâtında iştirak etkenlerinden şübhe etilgen eki kişiniñ yaqalanğanını bildirdi.
Mayıs 22-de Aqmescitteki mahkeme Mustafayev ve Smailovnı 20 künge tevqif etti.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.