Qara deñizge NATO-nıñ Daimiy mina qarşı gruppasınıñ flagmanı kirecek
Qara deñizge №2 NATO Daimiy mina qarşı gruppasınıñ flagmanı kirecek, Almaniya Arbiy Deñiz Quvetleriniñ FGS Werra (А 514) gemisi. Bu aqta fevral 15-inde “Çetel işler maydanı” közetüv gruppası, “Qara deñiz strategik tedqiqatlar İnstitutı” ve BlackSeaNews muarrireti bildire.
BlackSeaNews muarriri Andrey Klimenko şahsiy Facebook saifesinde bildirgeni kibi, cuma künü saba FGS Werra yaldayıcı bazası İstanbul boğazına kirip, İstanbul iskelesine turdı.
“”Elba” tipindeki altı yaldayıcı baza (404 leyhası) deñizde raketalı kater, torpedalı katerlerniñ bulunmasını temin etecek. Bu gemilerniñ esas vazifesi - cihaz ve silânıñ tamirlevi, gemilerniñ yaqıt, erzaq malları, silâ, yedek teminatı, kerekli vaqıtta elektrik energiyasınen de”, - qayd etti Klimenko.
FleetMon gemi ve limanlar malümat bazasında bildirilgeni kibi, FGS Werra (А 514) gemisiniñ uzunlığı 101 metr, keñligi ise 15 metr, o 1993 senesi yapılğan edi. 3586 tonnağa qadar yük kötere bile.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.