Qırımtatar faali Bekirov Aqmescit SİZOsında «pek az aşay» – advokat

Qırımda FSB tarafından silâ ve patlayıcı maddelerni qanunsız saqlağanında qabaatlanğan qırımtatar faali Edem Bekirov «qan şekeri yükselir dep, pek az aşay». Bu aqta advokat Aleksey Ladin Aqmescit SİZOsında Bekirovnı ziyaret etken soñ Qırım.Aqiqat mühbirine bildirdi.


Faal Aqmescitteki Semaşko hastahanesine çıqarılğanını, qan talilleri alınğanını (qan şekerini teşkermek içün) ve kardiolognıñ mesleatı içün kardiomerkezine çıqarılğanını imayecige tasdıqladı. 


«Ekimlerniñ işi 20-30 daqqa devam etti, neticede hulâsa çıqarıldı. Yani hastahanege daa bir kere formal şekilde çıqardılar. Ekimlerniñ aytqanına köre, qan şekeri normada. Amma Bekirov qan şekeri yükselir dep, SİZOda pek az aşamağa başladı, şu sebepten şekeri tüşti, dep bildirdi. Maña öyle de ayta: «Şekerim yükselir ve vaziyet komağa qadar kete bile dep, aşamaqtan qorqam», – dep tarif etti Ladin.




Advokatnıñ qayd etkenine köre, kardiolog sağlıq telükesiniñ seviyesini «pek yüksek» dep tanıdı.


İyünniñ 11-nde Avropa insan aqları mahkemesi Qırımda silâ ve patlayıcı maddelerni saqlağanında qabaatlanğan qırımtatar faali Edem Bekirovnıñ davası boyunca qarar çıqardı. Mahkeme onıñ hastahanege acele yatqızılmasını talap etti.


Daa evel Avropa insan aqları mahkemesiniñ qararına baqmadan, Qırımdaki Rusiye Federal telükesizlik hızmeti idaresiniñ üyken tahqiqatçısı İvan Romanets işğal etilgen Qırımnıñ Aqmescit SİZOsında tutulğan qırımtatar faali Edem Bekirovnı hastahanege yatqızmağa razı olmağanını bildirgen edi.


Qırımnıñ Rusiye prokuraturası FSBniñ Bekirovnı hastahanege avuştırmamaq qararına qoltuttı. 


Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.


Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.