Ukrainanıñ Türkiye elçihanesi qırımtatar halqı genotsidiniñ qurbanlarını añmağa çağıra
Ukrainanıñ Türkiye Cumhuriyeti elçihanesi qırımtatar halqı genotsidiniñ qurbanlarını añmağa çağıra. Bu aqta diplomatik temsilcilikniñ Facebook saifesinde aytıla.
«Mayısnıñ 18-nde Ukraina ve bütün dünya 1944 senesi mayıs 18-iniñ qırımtatar sürgünliginiñ qurbanlarını aña. Sizni de qırımtatar halqı genotsidiniñ qurbanlarını añma aktsiyalarına qoşulmağa davet etemiz. Mayısnıñ 17-nde aqşamdan başlap evlerde ya da balkonlarda matem şeriti baylanğan qırımtatar milliy bayraqlarını kötermege, mayısnıñ 17-nde saat 21:00-da ise «Qalbiñde ateş yaq» aktsiyası çerçivesinde qırımtatar halqı genotsidiniñ qurbanlarını añmaq maqsadınen pencerede hatıra ateşini yaqmağa çağıramız», – dep aytıla haberde.
Qırımtatar faali, Qırımtatar Milliy Meclisiniñ reis muavini Nariman Celâl yarımadadaki semetdeşlerine qırımtatar halqı genotsidiniñ yılına – mayısnıñ 18-ne – ev ve balkonlarda qara şeritli qırımtatar bayraqlarını asmağa teklif ete.
Mayısnıñ 18-nde Ukrainada qırımtatar halqı ile birdemlik aftası başlana – «Bir acı. Bir tarih». O, qırımtatar halqı genotsidiniñ yılına bağışlanğan bir sıra aq qorçalayıcı ve media leyhasından ibarettir.
Rusiye kontrolindeki Qırımnıñ milletlerara munasebetler Devlet komiteti bildirgenine köre, qırımtatar sürgünliginiñ yılına bağışlanğan er yıllıq «Qalbiñde ateş yaq» aktsiyası bu yıl koronavirus pandemiyası sebebinde online yapılacaq.
Mayısnıñ 18-nde Ukrainada ve dünyada 1944 senesinde qırımtatar halqınıñ Qırımdan sürgün etilmesi qurbanlarını añalar. Bu künde qırımtatarlar ile tolu birinci eşelon Orta Asiyağa yollanılğan edi. Umumen 180 biñden ziyade kişi sürgün etildi.
Qırımnıñ türlü şeerlerinde qırımtatar halqınıñ Qırımdan sürgün etilmesi qurbanlarınıñ hatırasına matem tedbirleri keçe.
Ukraina Yuqarı Radasınıñ qararına binaen, mayısnıñ 18-i Qırımtatar halqınıñ genotsidi qurbanlarınıñ hatıra künü dep ilân etildi.