Slovakiya “Qırım platforması” sammitinde iştirak etecek – Ukraina TİN
Slovakiya “Qırım platforması”nıñ sammitinde iştirak etmege razı oldı. Bu aqta yanvarnıñ 26-nda altıncı Ukraina-Slovakiya ekspert forumınıñ açıluv neticelerine köre Ukraina TİN matbuat hızmeti haber etti.
Ukraina TİN birinci muavini Emine Ceppar, Slovakiya zenaatdaşlarına “Qırım platforması”nıñ maqsatları ve mehanizmlerini taqdim etkeni, tebdirniñ iştirakçilerini 2021 senesi avgustnıñ 23-nde Kyivde inauguratsiya sammitine azırlıqlar aqqında haberdar etkenini aytıp berdi.
“Oz tarafından Slovakiya TİN devlet kâtibi İngrid Brotskova, Ukraina Slovakiyanıñ müim qomşusı olğanını, onıñ (Ukrainanıñ - QA) Avropa ve Avropaatlantik ıntıluvlarını desteklegenini ve onıñ topraq bütünliginiñ bozuluvını tanımağanını qayd etti”, – dep yazıla bildirmede.
Haber etilgenine köre, işğal etilgen Qırımdaki vaziyet aqqında aytıp, Ceppar, Slovakiya zenaatdaşınıñ diqqatını insan aqları vaziyetine, Rusiye nezaretinde olğan akimiyet tarafından devam etken yarımadanıñ arbiyleştirilüvine çekken.
Ukraina Tış işler naziriniñ birinci muavini Emine Ceppar Qırım.Aqiqat Radiosınıñ yaynında, kelecek yılnıñ mayıs ayında keçirilmesi planlaştırılğan yarımadanı işğalden azat etüv «Qırım platforması»sammitiniñ neticelerine köre muvafıq beyanname qabul etilecek, dep bildirdi.
Rusiye Tış işler nazirliginiñ spikeri Mariya Zaharovanıñ aytqanına köre, Rusiye tarafı Ukraina teşebbüsinen keçirilecek Qırım platformasında iştirak etmege azır, amma meydançıqta yarımada problemleri muzakere etilmeli – suv teminlevinden naqliyatqa qadar.
Rusiye kontrolindeki Qırım yolbaşçısı Sergey Aksenov emin ki, yañı halqara meydançıqnıñ quruluvı «Qırımnı qaytarmağa» yardım etmeycek.
Qırımnı işğalden qurtaruv halqara meydançığı (Qırım platforması) – Ukraina akimiyetiniñ qırımlılarnıñ aqlarını qorçalamaq ve işğal altındaki yarımadanı azat etmek içün Ukraina ve halqara ortaqlarınıñ areketlerini koordinatsiya etmek içün muzakere platformasınen bağlı teşebbüsidir.
2020 senesi sentâbr ayında Ukraina prezidenti Volodımır Zelenskıy BM Baş Assambleyasınıñ 75-nci sessiyasında iştirakçi memleketlerni bu platforma qurulmasına qoşulmağa çağırdı.
Daa evel böyle planlarını Ukrainanıñ vaqtınca işğal etilgen topraqlar meseleleri nazirligi ve Ukraina Tış işler nazirligi aydınlatqanlar. Ukraina Tış işler nazirligi, Donbastaki zıddiyetni çezüv ve Qırımnı işğalden qurtaruv muzakere meydançıqları bir-birinden ayrı olmalı, dep tüşüne.
Ukraina Tış işler naziriniñ birinci muavini Emine Ceppar bildirgenine köre, Rusiyeni Qırımnı işğalden qurtaruv halqara platformasında iştirak etmege davet etecekler, amma iştirak etecegine inanmaylar. Bundan evel Ukraina Tış işler naziri Dmıtro Kuleba, Rusiyeni bu meydançıqta körmey, dep ayttı.
2020 senesi oktâbr ayında Poloniya Qırımnı işğalden qurtaruv halqara platforması çerçivesinde çalışmağa meraqlı, dep bildirdi.
Ukraina prezidenti Volodımır Zelenskıy bildirgenine köre, Avropa Birliginiñ liderleri Avropa Birliginiñ Qırımnı işğalden qurtaruv platformasına qoşulmağa azır olğanını ayttı. Resmiy Kyiv Qırımnı işğalden qurtaruv platformasına Türkiye, Malayziya, Slovakiya, Büyük Britaniya ve diger memleketler qoşulır, dep bekley.
Kreml, Qırım meselesi qapatıldı ve Rusiye onı halqara muzakerelerge almaycaq, dep bir qaç kere bildirgen edi.