Тошкент шаҳар ҳокимлиги Tumaris қандолатчилик фабрикаси ерини олиб қўйгани учун 2,7 млрд сўм товон тўлайди
Тошкент шаҳар ҳокимлиги Tumaris қандолатчилик фабрикаси жойлашган ер участкасини давлат ва жамоат эҳтиёжлари учун олиб қўйгани учун 2 759 055 981 сўм миқдорида товон пули тўлайди. Бу ҳақда Савдо-саноат палатаси матбуот хизмати хабар қилди.
Маълум бўлишича, аввалроқ Universal Plast Montaj Engineering компанияси ССПга мурожаат қилиб, хусусий мулкка тегишли ҳуқуқ ва манфаатларни ҳимоя қилиш ҳамда ноқонуний қурилганлик важи билан бузиб ташлашга ҳаракат қилинган Tumaris фабрикаси биносини сақлаб қолишда ёрдам сўраб мурожаат қилган.
Компания ССП билан биргаликда тўққиз ой давомида бир неча марта давлат ва бошқа инстанцияларга мурожаат қилди, дейилади хабарда.
20 март куни Тошкент туманлараро иқтисодий суди даъвогарнинг мурожаатига асосан ер участкасини давлат ва жамият эҳтиёжлари мақсадида олиб қўйгани учун Тошкент шаҳар ҳокимлигидан 2,759 млрд сўм миқдорида товон пули ундирилиши ҳақида ҳукм чиқаргани хабар қилинди.