Расман: Украинада террорчиликда гумонланиб қўлга олинганлардан топилган қирғиз паспортлари сохта
![Расман: Украинада террорчиликда гумонланиб қўлга олинганлардан топилган қирғиз паспортлари сохта](https://gdb.rferl.org/BCB1A401-3DCF-4148-A631-C3EE57CC021E_w800_h450.jpg)
Қирғизистон Давлат рўйхатга олиш хизмати Украинада террорчиликда гумонланиб қўлга олинган Россия фуқароларидан топилган қирғиз паспортлари сохта эканини расман маълум қилди.
“Мазкур паспортлардаги шахсий идентификация рақамлари бизнинг системамизда мутлақо мавжуд эмас. Бундай ПИНлар йўқ. Паспортларнинг серия номерлари текширилганида эса, ҳақиқатан ҳам бундай рақамдаги паспортлар берилгани аниқланди. Бироқ бу сериядаги паспортлар Украинада қўлга олинган одамларга эмас, мутлақо бошқа одамларга берилган. Паспортлардан бири эса базасда яроқсиз деб рўйхатга олинган. Мана шуларнинг асосида биз паспортлар сохта деган хулосага келдик”, деди Давлат рўйхатга олиш хизмати матбуот котиби Элиза Кидирмишова.
Миллий хавфсизлик хизмати расмий вакили Рахат Сулайманов Украинада қўлга олинганлардан топилган паспортлардан бири аввал Қирғизистонда яшовчи аёл кишига тегишли бўлгани, бироқ аёл бу паспортини Россияда 2015 йилда йўқотиб қўйгани аниқланганини билдирди.
Украина махсус хизматлари 17 апрель куни мамлакат ҳудудида "террорчилик ва сиёсий қотилликларни амалга оширишни режалаштирган" Россия махфий хизматининг 7 кишидан иборат бўлган гуруҳини қўлга олгани ҳақида маълум қилган эди.
Украин махсус химзатлари қўлга олинганлардан икки нафарида Қирғизистон паспортлари топилганини ҳам билдирган.