БЎҒМА ИЛОН ҲАҚИДА ҚИЗИҚАРЛИ ФАКТЛАР…
1. Бўғма илон бошқа қариндошларидан келажак авлодларни тухум қўйиш эмас, балки мушук ва бошқа жониворлар каби ҳомиладорлик даврини бошдан кечирган ҳолда дунёга келтириши билан кескин фарқланади.
2. Бразилия бўғма илони фақат қуруқликда, дарахтлар устида яшашни маъқул кўради. У ўлжасини ҳам фақат қуруқликдан қидиради.
3. Оддий бўғма илон эса одамлар яшайдиган жойга яқин манзилда умргузаронлик қилади. Одамларнинг кўпчилиги бўғма илонни атайин боқади. Чунки у сичқон ва каламушларнинг додини беради. Одамларга жиддий хавф туғилмаган тақдирда ҳеч қачон ҳужум қилмайди.
4. Бўйи ўсиб борган сари бўғма илон тез-тез пўст ташлаш ҳаракатига тушади. Бунинг учун ерга ишқаланиб, пўстининг маълум қисмларини танадан кўчириб олади.
5. Бўғма илон қоронғиликда ҳам ов қила олади. Бунга кўзлари ва бурни оралиғидаги ҳид билиш рецепторлари ёрдам беради.
6. Бўғма илоннинг фаоллиги об-ҳаво билан боғлиқ. Ҳаво ҳарорати қанча юқори бўлса, шунча фаоллашади.
7. У ўлжасининг кўкрак қафасига ўралиб олади-ю, янада қаттиқроқ қиса бошлайди. Шу жараёнда ўлжа бир неча марта нафас чиқаради ва ўпкасида ҳаво қолмайди. Бўғма илон эса тобора қаттиқроқ бўғиб, ўлжа то ўлмагунча қўйиб юбормайди.
ОЛМАХОН ҲАҚИДА ҚИЗИҚАРЛИ ФАКТЛАР
1. Олмахон Антарктида ва Австралиядан бошқа барча жойларда яшайди.
2. Олмахон сувда жуда яхши сузади. Аммо думи ҳўл бўлса, чўкиб кетиши ҳам ҳеч гап эмас.
3. Ҳар йили қиш учун олмахонлар алоҳида бекитиқча ин қуради. Шу инда қиши билан ейдиган емишини асрашади. Қиш бўйи оч қолмаслиги учун олмахонга 2, 5-3 минг дона ёнғоқ зарур бўлади.
4. Олмахонни қафасда сақланса, ўзидан кўпая олмайди. Бунга тутқундалиги жиддий халал беради.
5. Олмахоннинг эркаги урғочисини 1 километр узоқдан ҳис эта олади.
6. Олмахон дарахт тепасидан ўзи сезмаган ҳолда пастга қуласа ҳам ҳеч нарса қилмайди. Унинг думи парашют вазифасини ўтайди. Дарахтдан дарахтга сакраганда эса думи рулга айланади.
7. Олмахон фақат ёнғоқ билан чекланиб қолмайди. Кўпинча сичқон, калтакесакларни ҳам тутиб ейишга қодир.
8. Янги туғилган олмахон боласи 10 граммдан ҳам озроқ вазнга эга бўлади.
Олимжон ҲАЙИТ тайёрлади