Португалия россияликларга “олтин виза” беришни тўхтатди
Португалия хорижликларга инвестиция эвазига бериладиган “олтин виза” олиш учун Россия фуқароларидан тушган аризаларни кўришни тўхтатди. Бу ҳақда мамлакат ташқи ишлар вазири Аугусту Сантуш Силва CNN Portugal телеканалига берган интервьюсида билдирган.
Силва Португалия Европа Иттифоқи санкцияларини дастаклаб, Россия ёки Беларуснинг санкция рўйхатига тушган ҳар қанақа фуқаросининг (унда Португалия фуқаролиги бор-йўқлигидан қатъи назар) мулкини музлатиб қўйиши ва унинг мамлакатга киришини тақиқлашини қўшимча қилган.
Мулозимга кўра, Португалия Украинадан қочқин қабул қилишга тайёр – мамлакатда ҳозирнинг ўзида 28 мингга яқин украиналик истиқомат қилади. Бундан ташқари, Португалия Украинага ёрдам ваъда қилган: мамлакатга ҳарбий техника етказиб берилади. ТИВ вакили Украинада айни пайтда 14 нафар португалиялик борлигини айтган. У Украинадаги вазиятни “жуда жиддий” дея баҳолаб, ўз ватандошларини “яқин соатлар ичида” яширинган жойларидан чиқмасликка чақирган.
Хорижликларга инвестиция эвазига “олтин виза” бериш дастури Португалияда 2012 йил октябридан бошланган. Ўшандан буён мамлакат иқтисодиётига 277,8 миллион евролик сармоя ётқизган россияликларга 432 та виза берилган, дея қайд этган CNN Portugal.
Аввалроқ Буюк Британия Россия фуқароларига “олтин виза” бериш тўхтатилганини эълон қилган эди.