Америкалик хонанда Селена Гомес саломатлигидаги муаммолари туфайли фарзанд кўролмаслигини маълум қилди — Бизга қўшилинг: ???? https://t.me/joinchat/AAAAADwt0NGCRoONT4f1_Q
Фото: Grazia Хонанда Селена Гомес шифокорлар биполяр депрессия ташхисини қўйгунга қадар узоқ вақт давомида руҳий муаммолардан азият чекди. Дори-дармонларни қабул қилишни бошлагандан кейин 30 яшар қўшиқчи ўзини енгил ҳис қилди ва руҳий ҳолатини сезиларли даражада яхшилади. Аммо маълум бўлишича, ижрочидаги касалликни енгишга ёрдам берадиган дори воситалари унинг организмига салбий таъсир кўрсатади, деб ёзади Grazia. Селена Гомес Rolling Stone журналига берган интервьюсида бу ҳақда очиқ гапирди. Унинг сўзларига кўра, ҳомиладорлик даврида биполяр депрессия учун дори-дармонларни қабул қилиш туғилажак болада нуқсонлар хавфини оширади, шунинг учун унга фарзанд кўриш мумкин эмас. Шунга қарамай, хонанда ҳали ҳам она бўлишни режалаштирмоқда. «Мен фарзандли бўлишни хоҳлайман. Ва бўламан ҳам», — дея қўшимча қилган у. Шунингдек, Гомес ҳаётидаги энг даҳшатли даврнинг баъзи тафсилотлари билан ўртоқлашди. Маълум бўлишича, бундан тўрт йил олдин қўшиқчи турли хил овозларни эшитган ва ўз жонига қасд қилмоқчи бўлган, шундан сўнг унга паранойя (бирор ёмон нарса содир бўлишидан қўрқиш, хадиксираш) ташхиси қўйилган. У соғайиши учун 4 та психиатрия клиникасига ётқизилган. Ўша даврдаги воқеаларнинг асосий қисми даволаниш жараёнида унинг хотирасидан ўчиб кетган. «Менсиз дунё янада яхши бўлади, деб ўйладим. Биполяр бузуқликни қабул қилиш ва у билан қандай курашишни ўрганиш учун ўз устимда кўп меҳнат қилдим, чунки у йўқ бўлиб кетмайди», — деди Селена. Хонанданинг руҳий саломатлиги ёмонлашишига асосий сабаблардан бири унинг амалга ошмаган орзулари эди: «Мен 25 ёшимда турмушга чиқаман, деб орзу қилганман. Мен ўша ёшда оилали бўлишга тайёр бўлиш тугул, ҳатто бунга яқин ҳам эмасдим. Бу жуда аҳмоқлик, лекин ҳақиқатан ҳам ўшанда мен учун дунё қулади, деб ўйлаганман».