Суперфиналда Аргентина Францияни пенальтилар серияда мағлуб этиб, жаҳон чемпионига айланди
Аргентина ва Франция ўртасидаги финал баҳси билан Қатарда ўтган жаҳон чемпионатига якун ясалди.
«Лусаил» стадионида қарийб 90 минг мухлис қаршисида кечган ҳал қилувчи тўқнашув кутилган шиддатни тақдим эта олди. 23-дақиқада Усмон Дембеле Ди Марияни жарима майдонида йиқитгач, белгиланган пенальтини Месси голга айлантирди – 1:0.36-дақиқада яна Ди Мария ва Месси иккинчи голга сабаб бўлишди. Лионелнинг узатмасидан кейин Ди Мария жамоасининг иккинчи голига муаллифлик қилди – 2:0.
Танаффусгача майдонда умуман кўринмаган французлар юлдузи – Килиан Мбаппе иккинчи бўлимда катта саҳнага чиқди.
80-дақиқага келиб, Коло-Муанига нисбатан ишлатилган қўполликдан кейин Мбаппе 11 метрлик жарима зарбасини голга айлантирди – 2:1.
Орадан бир дақиқа ўтар-ўтмас, Килиан ажойиб зарбаси билан барчага ўз даражасини кўрсатиб, Аргентина мухлисларини карахт аҳволга солиб қўйди – 2:2.
Шу тариқа, ўйиннинг асосий вақтида ғолиб номи аниқланмагач, мухлислар ажойиб финалда экстра-таймларни кўрадиган бўлишди.
Дастлабки экстра-таймда яққол вазият Аргентинада бўлди. Алварес ўрнига захирадан майдонга тушган Лаутаро иккита ажойиб вазиятдан фойдалана олмади.
Тўртинчи таймга келиб, «Лусаил» стадиони навбатдаги марта ларзага келди. Бу сафар ҳам Лионель Месси катта саҳнага чиқиб, жамоасини яна ҳисобда олдинга олиб чиқди – 3:2.
117-дақиқага навбат яна Мбаппега келди. Килиан пенальти ишлаб, ҳет-трики эвазига мувозанатни қайтадан тиклади – 3:3.
120+5-дақиқага келиб бош ҳакам Марчиньяк жамоаларни пенальтилар сериясига таклиф этди. Лотереяда эса Мбаппе биринчи бўлиб тўпни дарвозага йўллаган бўлса, аргентиналиклардан Месси гол киритди.
Команнинг зарбасини Мартинес бартараф этгач, Дибала жамоасини олдинга олиб чиқди. Тчуамени эса зарбада адашди. Передес эса гол ургач, Коло Муани ҳам имкониятдан фойдаланди. Ҳал қилувчи зарба эса Аргентинага чемпионликни келтирди!
ЖЧ-2022. Финал. 18 декабрь
Аргентина – Франция 3:3. Пенальтилар серияси: 4:2
Голлар: 1:0 – 23, пенальти Месси, 2:0 – 36 Ди Мария, 2:1 – 80, пенальти Мбаппе, 2:2 – 81 Мбаппе, 3:2 – 108 Месси, 3:3 – 118, пенальти Мбаппе.
Аргентина – Мартинес, Молина (Монтьель, 90), Отаменди, Ромеро, Тальяфико (Дибала, 120), Де Поль (Паредес, 102), Мак Аллистер (Песселья, 116), Фернандес, Ди Мария (Акунья, 64), Месси, Альварес (Мартинес, 103).
Франция – Льорис, Кунде (Дисаси, 120), Варан (Конате, 113), Упамекано, Эрнандес (Камавинга, 71), Рабьо (Фофана, 96), Тчуамени, Жиру (Тюрам, 41), Гризманн (Коман, 71), Дембеле (Коло-Муани, 41), Мбаппе.
Огоҳлантиришлар: Фернандес (45), Рабьо (55), Тюрам (87), Жиру (90), Акунья (90), Паредес (114), Монтьель (116).