Наманганда ҳайдовчи Damas’да 25 нафар болани олиб кетаётгани аниқланди
Наманган туманида Damas автомобилига 25 нафар болани миндирган ҳайдовчига чора кўрилди. Бу ҳақда Наманган вилояти ИИБ ЙҲХБ ахборот хизмати хабар берди.
Қайд этилишича, Наманган тумани ИИБ ходимлари томонидан рейд ўтказилганда туман ҳудудида ҳаракатланаётган Damas ҳайдовчиси тўхтатилган. Автомобиль текширилганда ҳайдовчи йўловчи ташиш қоидаларига зид равишда ҳаракат қилиб, 25 нафар вояга етмаган болаларни олиб кетаётгани маълум бўлган.
Namanganda Damas haydovchisi yo‘lovchi tashish qoidalariga zid ravishda 25 nafar bog‘cha bolasini olib harakatlandi pic.twitter.com/jfTSbVt2Hf
— Шухрат Раззаков (@ShuhratRazzakov) February 28, 2023
Ҳайдовчининг айтишича, у ҳар куни болаларни боғчадан олиб келади, бу сафар эса болалар кўплиги сабаб машинага кўпроқ болаларни олишга мажбур бўлган.
Инспектор томонидан ҳайдовчига тушунтириш ишлари олиб борилиб, унга нисбатан тегишли баённома расмийлаштирилган.
Эслатиб ўтамиз, 2021 йили Фарғонада ҳайдовчи Damas’да 28 нафар боғча боласини олиб кетаётганида тўхтатилган эди. Ҳайдовчидан тегишли ҳужжатлар талаб қилинганида унда на ҳайдовчилик гувоҳномаси, на бошқа ҳужжатлар йўқлиги аниқланганди.