Абдуқодир Ҳусанов ва Ўзбекистон ўйини Англияда қандай баҳоланди?
Улар орасида Абдуқодир Ҳусанов ҳам бор. Клуб расмий сайти “шаҳарлик” футболчиларнинг халқаро майдондаги ўйинларига муносабат билдирди.
- Эрлинг Холанд, Абдуқодир Ҳусанов ва Умар Мармуш ўз терма жамоалари таркибида жаҳон чемпионатига чиқиш орзусини саралаш турнири доирасидаги учрашувларда ижобий натижалар билан қўллаб-қувватлади.
Бироқ клуб аъзоси Савиньо ўйнаётган Бразилия миллий терма жамоаси ашаддий рақиб Аргентинага қарши кескин ва муросасиз беллашувда 1:4 ҳисобида мағлубиятга учради.
Эрлинг Холанд етакчилигидаги Норвегия миллий терма жамоаси 2026 йили бўладиган жаҳон чемпионатига чиқиш учун юришни эндигина бошлади ва қаторасига иккита ғалабадан кейин ўз гуруҳида пешқадамга айланди. Бу гал норвегияликлар Исроил билан нейтрал майдон – Венгрияда куч синашиб, 4:2 ҳисобида зафар қучди. Холанд тўртинчи голни урди.
Яна бир муҳим учрашув Эронда бўлди. Абдуқодир Ҳусанов ўйнаётган Ўзбекистон миллий терма жамоаси Теҳронда 2:2 ҳисобида дуранг қайд этди ва бу натижа эронликларни 2026 йилги жаҳон чемпионатига олиб чиқди.
Агар Ўзбекистон ғалабани ушлаб қола олганида ўз тарихида биринчи марта жаҳон чемпионатига йўл оларди. Шунга қарамай, ўзбеклар ҳали ҳамон Шимолий Америка қабул қиладиган энг нуфузли мусобақага чиқиш учун жуда кучли позицияни эгаллаб турибди.
Абдуқодир Ҳусановнинг ўзи одатдагидек учрашувни тўлиқ ўтказди, ўзбеклар Ҳожимат Эркинов ва Аббосбек Файзуллаевнинг голлари эвазига икки бор ҳисобда олдинга чиқиб олган бўлса-да, рақиб ҳужумчиси Меҳди Таремининг иккита голи билан Эронга керакли бир очкони олиб берди.
Ўзбекистон навбатдаги учрашувларини июнь ойида ўтказади. Бўлажак баҳсда Абдуқодир Ҳусанов жамоаси Бирлашган Араб Амирликларидан бир очко олса ёки Қатарга қарши ўйинда ғалаба қозонса, ўз тарихида илк бор жаҳон кубогида иштирок этади.
“Сити” ҳужумчиси Умар Мармуш ўз таркибига жалб қилган Миср жамоаси ҳам жаҳон чемпионатига чиқиш учун жуда яхши имконият ҳосил қилди. Мисрликлар бу гал Сьерра-Леонени кичик ҳисобда енгиб, олти ўйиндан бешинчисини ғалаба билан якунлади. Улар ҳисобида битта дуранг ҳам бор.
Умар Мармуш 90 дақиқадан кейин тўхталишлар учун қўшиб берилган вақтда заҳирага олинди. Миср саралаш турнирида яна тўртта ўйин ўтказади.
Ниҳоят, Савиньо Бразилиянинг Аргентинага қарши саралаш учрашувида 69-дақиқада майдонга тушди. Бунгача мезбонлар учрашув тақдирини ҳал қилиб бўлганди. “Манчестер Сити”нинг собиқ ҳужумчиси Хулиан Альварес, Энцо Фернандес, Алексис Мак Аллистер ва Хулиано Симеоне киритган голлар аргентиналикларга 4:1 ҳисобида ғалаба келтирди. Бразилиянинг ягона жавоб тўпини Маттеус Кунья киритди, - деб ҳисобот тайёрлади mancity.com сайти эксперти Жонатан Смит.
Энди терма жамоаларга жалб этилган барча ўйинчилар “Манчестер Сити” ихтиёрига қайтиб келади ва бўлажак беллашувларга тайёргарликни бошлайди.