Қатар таслим қилинган ўйиндан сўнг бош мураббий ва жамоа сардори нималар деди?

Кеча “ЖЧ-2026” учинчи саралаш босқичи доирасида жуда муҳим ўйинлар бўлиб ўтди. Миллий терма жамоамиз Теҳронда Эрон билан 2:2 ҳисобида жанговар дуранг ўйнаган бўлса, Бишкекда Қирғизистон Қатарни 3:1 ҳисобида мағлубиятга учратиб, барчани ёқимли маънода ажаблантира олди.

Ўйиндан кейинги матбуот анжуманида Қирғизистон терма жамоаси устози Максим Лисицын ва жамоа сардори Валерий Кичин иштирок этиб, қуйидагиларни айтдилар:

Максим Лисицын:
"Йигитларнинг ҳаммасига катта раҳмат. Кеча матбуот анжуманида биз бутун жамоа бўлиб катта ишни амалга оширганимиз ҳақида гапиргандим. Бугун эса ҳаммаси режамиз асосида кечди. Ҳа, стандарт вазиятларда, айниқса бурчак тўпи ўйинга киритилаётган маҳалларда унчалик яхши ишлай олмадик. Лекин шундай бўлса ҳам учрашув учун тузган режамиздан чекинмадик. Рақибда четлатиш бўлганидан сўнг ўйинни ғалабага етказдик. Ўйлайманки, рақибнинг кучи ҳақида ортиқча гапириш шарт эмас. Лекин бизнинг йигитлар улардан яхшироқ ўйнашди.

Ғалаба яна бир бор жамоага ишониш кераклигини тасдиқлади. Ҳа, мазкур босқичда бир қатор учрашувларда керакли натижаларга эриша олмадик. Лекин шунинг баробарида рақибларимизнинг қандай кучга эга эканлигини тушуниб турардик ва шунга қарамасдан қўлларимизни туширмаган ҳолда олдинга интилишда давом этдик. Бугунги учрашувда мухлисларга қувонч бағишлаган йигитларнинг ҳаммасига раҳмат айтмоқчиман. Ўз навбатида бизни қўллаб-қувватлаган ишқибозларимизга ҳам миннатдорчилик билдирмоқчиман. Шу боис ўйиндаги натижа мен учун унчалик ажабланарли туюлмади. Тўғри, рақиб сафида четлатиш бўлгани ишимизни анча енгиллаштирди. Ўша четлатиш бизга қўл келди ва рақибга босим ўтказган ҳолда ўзимиз юзага келтирган имкониятдан унумли фойдалана олдик".

Валерий Кичин:
"Бугунги ғалабага дахлдор бўлган ҳар бир инсонга ўз миннатдорчилигимни билдириб ўтмоқчиман. Биз осон бўлмаган ишни амалга оширдик. Биринчи учрашувдан кейин бошимизни туширмадик ва Осиё чемпионига қарши учрашувни муносиб ўтказдик. Рақибимиз эса Осиёнинг икки карра чемпиони эди. Биз яхшироқ бўлдик. Бироқ, албатта, ҳаммаси осон кечгани йўқ. Учрашувга жуда яхши ҳозирлик кўрганимизни ўйиндан олдинги матбуот анжуманида таъкидлаб ўтгандим. Кўриб турганингиздек, биз ўйинга 100 эмас, балки 200 фоиз тайёр эканмиз. Шунинг учун ҳаммага раҳмат.

Ўйиндан-ўйинга ўтган ҳолда анча яхшироқ тўп суряпмиз, тажрибамизни оширмоқдамиз. Энг асосийси, футболчилар ўтказилган учрашувлардан керакли хулосаларни чиқариб, уларни таҳлил қилишмоқда. Бу ғалаба бўладими ёки мағлубиятми, фарқи йўқ. Биз муҳими, ўз ўйинимизни яхшилаяпмиз. Ҳозирги босқич таркибимиздаги ёш ўйинчиларни нималарга қодир эканлигини кўрсатиб бермоқда. Бундай беллашувлар ўз навбатида уларга янада ўсишда ёрдам беради, бу аниқ".