Рамзон Қодировнинг вояга етмаган ўғли Чеченистон полицияси куратори этиб тайинланди
Табрикларни қабул қилгач, Рамзон Қодировнинг ўғли Чеченистон Ички ишлар вазирлигининг Ўз хавфсизликни таъминлаш бошқармаси оператив-қидирув бўлимига янги раҳбар тайинлади. Шундан сўнг у бир неча ходимга Чеченистон қаҳрамонлари медалларини топширди.
2023 йил ёзида Адам Қодиров тергов изоляторида Қуръонни ёқиб юборган Никита Журавелни калтаклаганди. Қодиров дўппослаш тасвирларини эълон қилган ва ўғлининг бу ишидан фахрланишини айтган эди.
Шундан сўнг Адам Қодиров бир қанча мукофотларга сазовор бўлди, отасининг хавфсизлик хизматида лавозимни эгаллади ва Россия Мудофаа вазирлиги таркибидаги «Шайх Мансур» баталйонига раҳбарлик қила бошлади. Унга Чеченистон Қаҳрамони унвони ҳам берилди. Декабр ойида эса Рамзон Қодиров суд унинг ўғлини жазолашга қарор қилмаганини, Чеченистон расмийлари ҳам бу билан шуғулланмаслиги кераклигини айтган.
2024 йил феврал ойида Рамзон Қодировнинг тўнғич ўғли Ахмат Қодиров ёшлар ишлари бўйича вазир этиб тайинланган эди. Жорий йил февралда бўлса, Чеченистон етакчисининг тўнғич қизи Айшат Қодирова республика ҳукуматида бош вазир ўринбосари лавозимидан кетганди.