“Манчестер Сити”да йил футболчиси ким бўлади? Холанд, Гвардиол ёки кетаётган Де Брюйне?
Бу йилги саралашда уч номзод танлаб олинди: Йошко Гвардиол, Эрлинг Ҳоланд ва Кевин Де Брюйне. Ҳар бир футболчининг статистикаси ва мавсумдаги ўрни таҳлил қилиниши муҳим, чунки ҳар бири жамоа муваффақиятида алоҳида роль ўйнади.
Йошко Гвардиол — барқарорлик ва ҳимоядаги ишонч
Хорватиялик ҳимоячи Йошко Гвардиол мавсум давомида “Сити”нинг асосий таянчига айланди. У жами 50 та учрашувда қатнашди ва 4243 дақиқа майдонда ҳаракат қилди. Унинг ҳисобига 6 та гол ва 2 та голли узатма бор. Фаолиятининг ҳар бир дақиқасида барқарор ва ишончли ўйини билан жамоага муҳим ёрдам кўрсатди.
Унинг универсаллиги ва голли ҳужумларга қўшилиши уни нафақат ҳимоячи, балки ҳақиқий “барча вазифани бажарувчи” футболчига айлантирди.
Эрлинг Ҳоланд — гол машинаси яна ишда
Норвегиялик ҳужумчи Эрлинг Ҳоланд мавсум мобайнида 41 та баҳсда иштирок этди. Ушбу учрашувларда жами 30 та гол уриб, 4 та голга ассистентлик қилди. Ҳужумдаги ўткир ҳаракатлари ва рақибларнинг дарвозасига доимий таҳдиди билан “Сити”нинг етакчи тўпурари сифатида яна бир бор ўзини намоён қилди.
Ҳоланд янада кўпроқ гол урган бўлиши мумкин эди, аммо айрим жароҳатлар унинг маълум вақт майдондан четда қолишига сабаб бўлди. Шунга қарамай, у яна голли кўрсаткичлар бўйича энг юқорида турибди.
Кевин Де Брюйне — кеч “уйғониш”, эҳтимол, сўнгги мавсум
Бельгиялик маэстро Кевин Де Брюйне жорий мавсумда 37 беллашувда 2227 дақиқа ўйнади. Унинг ҳисоби — 6 гол ва 8 ассист. Аммо унинг мавсумдаги фаоллиги деярли иккинчи яримга тўғри келади, чунки КДБ жароҳат сабаб кўп ўйинларни ўтказиб юборган эди.
Унинг сўнгги ҳафталардаги ўйинлари юқори савияда бўлди. Айрим тахминларга кўра, бу унинг жамоадан кетиши арафасидаги сўнгги “шоу”си бўлиши мумкин. Балки шунга кўра ҳам Кевин мухлислар юрагида алоҳида ўрин эгаллашда давом этмоқда.
Мухлислар сўнгги сўзни айтади
Ҳозирда “Сити” жамоаси расмий сайт ва ижтимоий тармоқлари орқали мухлислардан овоз тўпламоқда. Яқин кунларда мавсумнинг энг яхши футболчиси аниқланиши кутилмоқда.
Zamin.uz таҳририяти “Манчестер Сити”даги бу сўнгги мавсум якунларини диққат билан кузатишда давом этади. Сиз кимга овоз берган бўлар эдингиз? Гвардиол, Холанд ёки Де Брюйне?