Муниса Ризаева: Қийинчиликлардан қандай ўтгани ва ҳаёт сабоқлари (видео)
Кадрларда Мунисанинг ҳис-туйғуларини, ўтмиш хотираларидан то бугунги ҳаётга бўлган миннатдорлик ва шукроналикни ёрқин кўриш мумкин. У ўз сўзларида жуда эрка, ҳеч нарсадан кам бўлмаган қиз бўлганини айтади. 17 ёшида отасининг 150 000 фунт стерлингини (бугунги ҳисобда 700 000 доллар) бир ҳафтада сарфлаб юборган пайтларини табассум билан ёдга олади. Бундай ишдан сўнг, отаси унга чекловлар қўйган, бу эса Мунисани ҳаёт ҳақиқатларини ва меҳнат қийматини англашга ундаган.
Ҳаётнинг курашли босқичлари Мунисани Лондоннинг қиммат ресторанида официантликка ва идиш ювишга мажбур қилди. Кечаси соат 24:00 гача — официант, тун ярмидан тонггача эса — оддий идиш ювувчи бўлиб ишлаган. У ўзини нафақат меҳнатга, балки ҳаётга ҳам қайтадан кўникишга мажбур қилганини таъкидлайди.
Муниса “Mandarin Oriental” меҳмонхонасида оддий хизматчи бўлиб иш бошлаб, икки йил ичида бош менежер лавозимигача кўтарилди. 2008 йилда Тошкентга қайтиб, ўз меҳмонхонасига асос солди. Унинг тақдиридаги янги саҳифа эса клипмейкер Ёдгор Носиров билан танишувдан бошланди. Муниса “Ҳижрон” фильмида бош рол ижро этиб, қисқа фурсатда кино олами ва мусиқа санъатида машҳурликка эришди.
Муниса Ризаева бугунги муваффақиятларининг асосий сабабчиси сифатида отасининг жазо ва чекловларини, меҳнатга ундаган тарбиясини алоҳида эътироф этади. "Отамнинг чекловлари ва талабчанлиги бўлмаганида, бугунги Муниса Ризаева бўлмасдим", — дейди у. Ҳозирдаги ҳаётидан мамнун, ҳар куни шукр қилади ва отасига миннатдорлик билдиради.
Бугунги кунда Муниса нафақат ижодкор, балки оилапарвар она сифатида ҳам мухлисларини руҳлантириб келмоқда. Унинг самимий суҳбатлари ва ҳаётий сабоқлари кўплаб ёшларга илҳом манбаи бўлиб хизмат қилмоқда.