Гасперини нега “Ювентус”ни рад этиб, “Рома”га йўл олгани маълум бўлди
Маълум бўлишича, Гасперинига фақат “Рома” эмас, балки Италиянинг бошқа етакчи клублари ҳам қизиқиш билдирган. Хусусан, Туриннинг суперклуби “Ювентус” ҳам тажрибали мутахассисни ўз таркибига жалб қилишга ҳаракат қилган.
Бироқ журналист Сандро Сабатини тарқатган маълумотларга кўра, “Ювентус” спорт директори Дамьен Комоллининг муомаласи Гасперинига маъқул келмаган. Қизиғи шундаки, Комолли мураббийга қўнғироқ қилиб: “Мени “Ювентус” нега айнан сени бош мураббий сифатида танлаши кераклигига ишонтир! Нега айнан сени танлашимиз керак?” деган. Гасперини эса бу сўзларга ўта қатъий ва шарафли тарзда жавоб қайтарган: “Қўнғироқни мен эмас, сен қилдинг. Демак, танлашга ишонган сенсан”, деб жавоб бериб, суҳбатни тугатган.
Натижада, 67 ёшли италиялик мутахассис “Рома”нинг таклифини қабул қилди ва клуб билан 2028 йилнинг ярмигача амал қиладиган шартнома имзолади. Энди “Рома”да тўлиқ янгиланиш даври бошланади.
Гасперинининг келишидан сўнг жамоа таркибида ҳам катта ўзгаришлар кутилмоқда. Бу жараёнда, албатта, ўзбекистонлик ҳужумчи Элдор Шомуродовнинг тақдири ҳам муҳим аҳамият касб этади. Унинг “Рома”даги мавқеи мураббийлар алмашиши билан бирга янада кучайиши ёки аксинча, пасайиши мумкин.
Энди Элдорнинг янги бош мураббий кўз ўнгида қандай ўйин намоён этиши жуда муҳим. Гасперинининг футболга бўлган қарашлари, тактик ёндашуви ва тузилмага бўлган талаблари Шомуродовга яна бир бор ўзини кўрсатиш имконини яратиши мумкин.
Айни пайтда “Рома”нинг асосий муаммоларидан бири ҳужум чизиғидаги самарадорлик ҳисобланади. Агар Элдор яхши тайёргарлик кўрсатса ва Гасперинининг талабларига мос тушса, янги мавсумда уни асосий таркибда кўришимиз эҳтимолдан холи эмас.
Ҳозирча эса клуб атрофида катта интрига ва юқори кутилмалар ҳукм сурмоқда. Янги мураббий ва янги мавсум — “Рома” учун ҳам, Шомуродов учун ҳам муҳим синов ва янги босқични бошлаб беради.