Шомуродовнинг келажаги: “Рома”дан чиқиш ва трансфер эҳтимоллари ортмоқда
Кейинги мавсумнинг иккинчи ярмида Шомуродов “Рома” сафида ўзининг энг яхши ўйинларини намойиш этиб, клуб раҳбарияти ва мухлислар эътиборини янада қозонди. Илгари римликлар уни бошқа жамоага ижарага беришни кўзлаган бўлса, бу сафар қўлдан чиқаришга шошилмаяпти. Италия ОАВ ёзишича, “Рома”да унинг мақоми кучайган, бу эса трансфер бозорида унга талабни янада оширмоқда.
Маълумки, Элдор “Женоа”дан “Рома”га ўтган пайтда унинг трансфери клуб учун 20 миллион еврога тушган ва бу “бўрилар” тарихидаги энг қиммат харидлардан бири сифатида қайд этилган эди. Илк мавсумлар Шомуродов учун осон кечмади, чунки асосий таркибга кириб боришда анча қийналди ва натижада “Специя” ҳамда “Кальяри”да ижарада ўйнади. Аммо ўтган мавсумдаги муваффақиятли ўйинлари ва асосий таркиб учун курашдаги барқарорлиги унинг ҳали ҳам юқори даражада эканини кўрсатди.
Ёзги трансфер бозорида талашилаётган форвард
Мутахассислар ва футбол нашрлари таъкидлашича, “Рома” молиявий фэйр-плей қоидаларига риоя қилиш учун бир қатор трансферларни амалга ошириши шарт. Клуб УЕФА талабларини бузмаслик ва санкциялардан қочиш мақсадида, катта трансфердан даромад олишни режалаштирмоқда. Шу туфайли, “Рома”да бир қатор асосий ўйинчилар, хусусан, Шомуродов ва Анжелиньо трансферларига кўз тикилган.
“Башакшеҳир” клуби Элдор учун аввал 7 миллион евро таклиф қилган бўлса, Франциянинг “Ренн” клуби ҳам курашга қўшилди. “Ренн”да “Рома” қизиқиш билдираётган Арно Калимуэндо ҳам ўйнайди. Бу эса келишув эҳтимолини янада мураккаблаштиради. Французлар иштирокидан сўнг, турк клуби Шомуродов учун таклифни 8 миллион еврогача кўтарди. Бу сумма “Рома”га молиявий фэйр-плейни таъминлашда катта ёрдам беради.
Клубда ислоҳотлар ва ёшариш сиёсати
Бу йил “Рома”да катта ўзгаришлар бўлиши кутилмоқда. Жан Пьеро Гасперини бош мураббий бўлиши кутилмоқда ва клуб асосан 22-26 ёшли футболчиларга ишониш ниятида. Таркибни ёшартириш сиёсати доирасида тажрибали ва ёши катта футболчилар билан хайрлашиш эҳтимоли ҳам бор. Шу нуқтаи назардан, яқин кунларда 30 ёшни қарши оладиган Элдор Шомуродовнинг ҳам клубда қолиши мавҳум бўлиб қолди.
Бу орада “Рома” аргентиналик жаҳон чемпиони Леандро Паредесни ҳам сотиш ниятида. Бу футболчи учун “Бока Хуниорс”дан 3,5 миллион евро талаб қилинмоқда.
Шомуродов эса ўтган мавсумдаги фаолияти туфайли клуб билан шартномасини 2027 йилгача узайтирган. Аммо ёшариш сиёсати ва молиявий босимлар туфайли, форвардимиз ёзги трансфер ойнасида бошқа клуб сафида тўп суриши эҳтимолдан ҳоли эмас.
Қайси йўлни танлайди?
Ўзбекистон миллий терма жамоасининг сардори учун бир неча йўналишлар очиқ: Туркия, Франция ёки яна бошқа Европа клублари. Рим клуби ҳам, футболчи ҳам ўз келажагини яқин орада аниқлаши кутилмоқда. Мухлислар эса, мамлакатнинг энг номдор легионери қаерда тўп суради, деган саволга қизиқиш билан жавоб кутмоқда.
Элдор Шомуродов атрофидаги вазият янада қизиқарли ва долзарб тус олмоқда. Мавсум натижалари ва Европа трансфер бозоридаги талаб, унинг келажаги учун янги имкониятлар эшигини очиши мумкин. Биз эса, миллий терма жамоамизнинг етакчиси қайси клубда тўп суради, деган интригани кузатишда давом этамиз.