Левандовски “Барселона”дан кейин Саудияда тўп сурадими?
Таъкидланишича, ҳозирда Левандовски вакиллари Саудия Арабистони клублари билан тўғридан-тўғри музокаралар ўтказмаяпти. Аммо Роберт ўз яқинларига, 2026 йил ёзида шартнома якунлангач, янги йўналишга йўл олиш ҳақида фикр билдирган. Катта эҳтимол билан у Осиё футболига, хусусан, сўнгги йилларда юлдузлар оқими сезиларли даражада кучайган Саудия Арабистони чемпионатига йўл олиши мумкин.
Левандовски бу қарорга қарамай, ҳозирча барча эътиборини “Барселона”даги сўнгги мавсумига қаратади. Клубда қолган вақтда эса ундан яна юқори даражада ўйин ва самарадорлик кутилади. Чунки ўтган мавсумда у барча мусобақаларда 52 та ўйинда иштирок этиб, 42 та гол ва 3 та голли пасга муаллифлик қилди — бу, шубҳасиз, юқори натижа.
Каталония клуби раҳбарияти ҳам, Левандовски ҳам шартномани узайтириш ниятида эмас. Бу эса янги мавсум унинг "Барселона" сафидаги сўнггиси бўлиш эҳтимолини кучайтиради. Кўпчилик футбол мутахассислари ва ишқибозлар, келгуси мавсумда Левандовски “Барса”нинг ҳужумдаги асосий кучларидан бири бўлиб қолишини ва Каталониялик мухлислар учун яна кўп бор ҳаяжонли лаҳзалар туҳфа этишини кутмоқда.
Бугунги кунда Саудия Арабистони чемпионатида дунёнинг турли юлдузлари тўп сурмоқда ва чемпионат нуфузи ортиб бормоқда. Левандовскининг ушбу лигага йўл олиши нафақат молиявий жиҳатдан, балки бренд қиймати ва маркетинг нуқтаи назаридан ҳам у учун янги имкониятлар эшигини очиши мумкин.
Катта эҳтимол билан, 2026 йил ёзида Роберт Левандовски “Барселона”дан кетиб, Саудия Арабистони чемпионатида ўз фаолиятини давом эттиради. Аммо унгача у мухлисларни юқори даражадаги голлари ва ўзига хос ўйин услуби билан хурсанд қилишда давом этади.