Эрдўғон Исроилга қарши қаттиқ жавоб берди...
Истанбулда бўлиб ўтган анжуманда сўзга чиққан Эрдўғон, Ғазо секторида Исроил армияси томонидан амалга оширилган вахшийликларни ёдга солди. Унинг таъкидлашича, айнан Исроил Ғазодаги шифохоналарга 700 дан ортиқ ҳужум қилган. “Биргина Ғазо секторидаги тиббий муассасаларга қарши бундай кўламдаги ҳужумлар замонамиздаги энг шармандали ва қонли ҳодисалардан биридир”, — дея алоҳида урғу берди Туркия раҳбари.
Эрдўғоннинг таъкидлашича, Ғазони “дунёнинг энг катта очиқ ҳаводаги қамоқхонаси”га айлантирган давлатнинг инсон ҳуқуқлари ҳақида сўз юритиши “нафақат иккиюзламачилик, балки бетамизлик ва юзсизлик”нинг энг ёрқин кўринишидир.
Маълумотларга кўра, Исроил ва Эрон ўртасидаги зиддият 13 июнь куни яна кескинлашди. Бу куни Исроил томони кенг кўламли ҳарбий амалиётларни бошлади. Жавоб тариқасида Эрон томони ҳам бир нечта ракета учиргани маълум қилинди. Улардан бири, Исроил расмийларига кўра, Беэр-Шева шаҳридаги “Сорока” шифохонасига урилган ва натижада 80 дан ортиқ киши жароҳат олган.
Исроилнинг юқори мартабали раҳбарлари — бош вазир Бинямин Нетаняҳу ва спорт вазири Мики Зоар Эроннинг ушбу ҳаракатини кескин танқид қилиб чиқишди. Нетаняҳу Теҳронга “буюк жавоб” бўлишини ваъда берди, Зоар эса “фақат энг қабиҳ инсонлар шифохонага ҳужум қилади” дея сўз қилди.
Аммо Эрон бу айбловларни рад этди. Форс расмийларининг таъкидлашича, ракета шифохонани нишонлаган эмас, у зарба тўлқини таъсирида зиён кўрган. Шунингдек, улар “Сорока” шифохонаси ҳарбий мақсадларда ишлатилгани ва у ерда Исроил ҳарбийлари даволанаётгани ҳақида маълумотлар келтиришган.
Ушбу воқеа халқаро медиа ва таҳлилчилар томонидан “иккиюзламачилик” деб баҳоланди. Исроилнинг нуфузли нашри “Haaretz” таҳлилчиси Йоав Гровейс шундай ёзади: “Ғазода шифохоналар ўққа тутиладиган бўлса, оқлашга ҳаракат қиламиз. Аммо ўз шифохонамизга ҳужум бўлса, ўйин қоидалари бузилди деб бақирамиз”.
БМТ, ЖССТ ва Халқаро Қизил хоч қўмитаси шифохоналарнинг дахлсизлиги ҳақида расмий баёнотлар билан чиқди. “Ҳар қандай шароитда ҳам тиббий муассасаларга ҳужум қилиш мумкин эмас” — дейилади расмий билдирувда.
Туркия президенти Эрдўғон эса Ғазо ҳудудидаги вазиятни “инсоният учун шармандали саҳифа” деб атади. Унинг фикрича, Ғарб мамлакатлари, айниқса, АҚШ ва Европа Иттифоқи бу вазиятда сукут сақлаётгани билан ўзларининг ҳақиқий чеҳрасини кўрсатмоқда.
Ҳарвард университети тадқиқотчилари эълон қилган ҳисоботга кўра, Исроил армияси томонидан 2023 йил 7 октябрдан кейин Ғазодаги 36 та шифохонага ҳаводан зарба берилган. Улардан энг фожеалиси — “Ал-Аҳлий” шифохонасидаги ҳодиса бўлиб, у ерда 800 дан ортиқ фуқаро ҳалок бўлган.
Жаҳон соғлиқни сақлаш ташкилоти директори Тедрос Гебрейесус шундай деди: “Ғазодаги бомба зарбаларидан кўра кўпроқ одамлар касалликлар сабабли вафот этмоқда. Чунки шифохоналар йўқ қилинган, дори-дармон йўқ, тиббий хизматлар фалокат ҳолатида”.
Урушнинг инсон ҳаётига таъсири ва ҳарбий ҳаракатларда шифохоналарни нишонга олиш каби амалиётлар халқаро ҳуқуққа зид ҳисобланади. Аммо бугунги кунда Ғазода содир бўлаётган воқеалар бу ҳуқуқлар қанчалик ҳимоясиз эканини намоён қилмоқда.
Туркия эса, ўз навбатида, минтақа тинчлиги ва адолат тикланиши учун дипломатик саъй-ҳаракатларни давом эттиришини маълум қилди. Эрдўғоннинг сўзларига кўра, бу фақат бир давлат ёки бир халқнинг эмас, бутун инсониятнинг шаъни масаласидир.