2 ёшли бола қийноқда ҳалок бўлди – тарбиячи қамалди
Бунга сабаб – хусусий боғчада содир бўлган шафқатсиз муносабат ва натижада вояга етмаган боланинг ўлими. “Jajji nihollar” номли хусусий мактабгача таълим муассасасида 2 ёшли бола Зубайр Анваржонов ўзининг тарбиячиси томонидан шафқатсиз қийноққа учраб, ҳаётдан кўз юмди.
Суд ҳужжатларида қайд этилишича, 1997 йилда туғилган Лайло Алимова ушбу боғчада тарбиячи сифатида ишлаган. 1957 йилда туғилган Вазира Гиязова эса услубчи лавозимида фаолият юритган.
Жиноий иш материалларига кўра, 2024 йил 9 декабрдан 11 декабргача бўлган даврда бола нафақат беғараз, балки зўравон тарбия таъсири остида қолган. Гиязова овқат емай қўйгани учун болани бошидан урган, кийимидан тортиб судраган ва сўнгра қаттиқ уриб, уни краватга ташлаб юборган.
Лайло Алимова эса тушликда ухламаган болага нисбатан янада ёвуз муомала қилган. У болани бир неча марта кўтариб, ерга улоқтирган. Оғзига чойшаб тиққан, бўйнидан бўғган ва орқасига тепган. Унинг сўзларига кўра, бу ҳаракатларни “жаҳл устида” қилган. Судда айбини тўлиқ тан олган ва юрагидан афсус билдирган. Аммо афсус ҳеч нарсани ўзгартира олмади. Боланинг ҳаёти якун топди. Алимованинг баёнотига кўра, 11 декабрь куни Зубайр ухламасдан хонада йиғлаб турган. Шу пайт у болани оёғи билан тепган. Тана деворга урилиб тушган. Сўнгра кўтариб краватга улоқтирган. Бу пайтда хонага Гиязова кириб, болани яна уриб, “ухла, ўлдираман” деган. Кўп ўтмай, тарбиячи яна болага нисбатан зўравонлик қилган. Қўли билан юзига урган, тинимсиз уришни давом эттирган. Орадан вақт ўтиб, у болани яна улоқтирган. Қўрқинчли сўзлар билан таҳдид қилган. Ҳатто ойнадан ташлаб юбориш билан ҳам қўрқитган. Бу шунчаки бир зўравонлик эмас, балки жиддий руҳий ва жисмоний тазйиқ эди.14:21 ларда эса у Зубайрнинг олдига стулда ўтирган. У ухламасдан йиғлаб тургани учун, оғзига ўз чойшабини тиққан. Юзига урган, қўли билан оғзини ёпган, бир неча марта бўғган. Бу ҳаракатлар боланинг ҳаёт фаолиятига зарар етказган.Охир-оқибат, бола ҳаракатсиз ҳолатга келган. Қўрқиб кетган тарбиячи уни ҳожатхонага олиб бориб юзини ювган. Сўнгра жойига ётқизган. Аммо бола ҳали ҳам жонсиз ётарди. У бошқа ходимларни чақирган. Тез ёрдам чақирилган.Шифокорлар келиб, болани шифохонага олиб кетишган. Аммо кеч бўлган эди.2024 йил 14 декабрь куни Зубайр Анваржонов шифохонада вафот этди. Суд жараёнида Лайло Алимова Жиноят кодексининг 104-моддаси 3-қисми “д” бандига асосан айбли деб топилди.Унга нисбатан 6,5 йил муддатга озодликдан маҳрум этиш жазоси тайинланди. Гиязова эса 110-модда 2-қисми “а” ва “в” бандларига кўра айбли деб топилиб, 3 йил озодликни чеклаш жазосини олди. Бу воқеа нафақат боланинг яқинлари, балки бутун жамият учун қаттиқ силкиниш бўлди. Ота-оналарнинг ишончини суиистеъмол қилган тарбиячилар энди жазо олишди. Лекин ушбу ҳодисадан сўнг битта савол очиқ қолади: бу каби шафқатсизликлар қандай қилиб фош бўлмаяпти?Боғчаларда назорат механизмлари қай даражада самарали?Бир боланинг ҳаёти қурбон бўлди. Ундан бошқаларни асраш эса жамиятнинг бурчидир.
Бундай фожеалар такрорланмаслиги учун, барча хусусий ва давлат муассасаларида ички назоратни кучайтириш зарур.Янги технологиялар, видеокузатув, педагогик тестлар ва болалар билан ишлашга рухсатномалар – буларнинг барчаси қайта кўриб чиқилиши керак.
Ўғил ёки қизини боғчага топширган ҳар бир ота-она, уни хавфсиз қўлларга берганига ишонч ҳосил қилишни истайди.
Аммо бу ишонч қай даражада оқланаяпти – бу саволнинг жавобини жамият беради. Бу воқеа – таълим муассасаларидаги масъулиятсизлик ва шафқатсизликка қарши жиддий сигнал. Ҳар бир бола севги, меҳр ва эҳтиёж билан тарбияланишга ҳақли. Зубайр Анваржоновнинг ҳаётининг қисқалиги эса барча учун оғир дарс бўлиб қолади.