Лула да Силва: "Трамп АҚШни бошқариш учун сайланган, дунё императори бўлиш учун эмас"

Бразилия раҳбари Лула да Силва АҚШ президенти Дональд Трампга қатор кескин танқидлар билан мурожаат қилди. Унинг сўзларига кўра, Трамп дунё сиёсатини ўз ҳукмига олиш ниятидан воз кечиши, ва энг аввало, ўз юртини бошқаришга эътибор қаратиши керак. Бу ҳақда у халқаро анжуман чоғида баёнот берди.

Лулага кўра, Трамп дунё императори каби ҳаракат қилмаслиги лозим. “У Америка Қўшма Штатларини бошқариш учун сайланган, урушлар қўзғаш учун эмас”, – дея таъкидлади у. Шунингдек, у Трампнинг Россия президенти Владимир Путин билан урушни тўхтатиш ҳақида музокаралар олиб бориш ниятини қўллаб-қувватлаганини билдирди.

“Гарчи орамизда тафовутлар бор бўлса ҳам, мен унинг тинчликка интилганини олқишлайман”, – деди Лула. Аммо шундан сўнг, у ҳафсаласини пир қилган янгилик ҳақида гапирди: “Бу ҳафта эшитдимки, у энди кўпроқ қурол сотиш ниятида экан. Бу – жуда хавотирли ҳолат.”

Президент Лула дунёдаги сиёсий зиддиятларни танқид қилиб, аҳолининг ҳақиқий муаммоларини унутмаслик кераклигини эслатди. Унга кўра, бугунги кунда НАТО давлатлари ҳарбий харажатларини 5 фоизгача ошираётган бир пайтда, Ер юзида 733 миллион одам очлик билан курашаётгани ачинарли ҳолатдир.

“Биз тинчлик ҳақида гапираяпмиз, аммо миллиардлаб пуллар қурол-аслаҳага сарфланяпти. Бу – глобал даражадаги зиддиятдир”, – деди у. Унинг фикрича, сиёсатчилар урушни эмас, одамларни қутқаришни биринчи ўринга қўйишлари шарт.

Лулага кўра, дунё етакчилари томонидан қабул қилинаётган қарорлар тинчликни таъминлашга эмас, балки қўрқув ва босим орқали назоратни сақлаб қолишга қаратилган. Бу эса, унинг таъбири билан айтганда, “жуда ғалати ва издан чиққан дунёда яшаяпмиз” деган хаёлни уйғотади.

Шунингдек, у халқаро ҳамжамиятни тинчлик сари қадам ташлашга, сиёсий қарама-қаршиликлар ўрнига ҳамкорликни йўлга қўйишга чақирди. “Дунё императори бўлиш эмас, глобал ҳамжиҳатликни таъминлаш – бугунги куннинг асосий вазифаси бўлиши керак”, – дея сўзини якунлади Лула да Силва.