Дмитрий Биволнинг собиқ турмуш ўртоғи алимент ҳақида гапирди
Россиялик машҳур боксчи Дмитрий Биволнинг собиқ рафиқаси Екатерина Бивол яна бир бор омма олдида шахсий ҳаёти ҳақида сўзлаб, бу сафар фарзандлари учун олинаётган алимент масаласига тўхталди. Унинг таъкидлашича, ажралишдан кейин болаларнинг ҳаёт даражаси пасаймаслиги керак, аммо амалда бу шарт бажарилмаяпти.
«Мамлакатимизда қонун бор: ажралишдан сўнг болаларнинг турмуш даражаси пастламаслиги шарт. Катта ўғлим уч ёшидан бери хоккей билан шуғулланади, унинг конкиси тахминан 72 минг рубл туради. Уни мен харид қилдим, лекин нега Бивол эмас? Нега отаси билан спортга қадам қўйган ўғлим энди отасисиз бу машғулотни ташлаши керак? Ҳозир Дмитрий ойига 128 минг рубл тўлайди, аслида эса икки фарзанд учун камида 516 минг рубл талаб этилади», — деди Екатерина «Пусть говорят» дастурида.
Маълумот учун, жуфтлик 2023 йилда расман ажрашган эди.
Екатерина Биволнинг бу каби очиқ баёнотлари жамоатчиликда кенг муҳокамаларга сабаб бўлмоқда. Айниқса, машҳур боксчи каби катта даромадга эга спортчининг фарзандлар учун тўлайдиган алимент миқдори кутилганидан паст экани кўплаб саволларни келтириб чиқарди.
Шуни алоҳида қайд этиш жоизки, Екатерина фарзандларининг таълим ва спорт билан шуғулланиши учун барқарор моддий ёрдам зарурлигини таъкидлади. Бу эса нафақат оилавий можаро, балки кўплаб фуқаролар учун долзарб ижтимоий муаммони ҳам ёритиб бермоқда.