Раҳмонали Суропов “Қалпоқ” Warner Bros’га қандай етиб борганини ҳақида сўзлаб берди
“Қалпоқ” ҳажвий кўрсатуви асосчиси, актёр ва сценарист Раҳмонали Суропов ушбу лойиҳа қандай қилиб дунёга машҳур Warner Bros кинокомпанияси эътиборига тушгани, АҚШга сафар таассуротлари ҳамда ижодий ҳаётидаги қизиқ воқеалар ҳақида сўзлаб берди.
Унинг айтишича, дастлаб Warner Bros’дан келган таклифномани фақат “Қалпоқ” ҳажвий кўрсатуви учун юборилган, деб ўйлашган. Аммо АҚШга етиб боргач, танловда 30 давлатдан ижодкорлар иштирок этаётгани маълум бўлган. Икки давлат четлатилгандан сўнг, 28 мамлакатдан келган сценарийлар қабул қилинган. Суроповнинг таъкидлашича, Америкада китоблар ёзиб, сценарийлар билан шуғулланадиган таниши орқали уларга ҳам таклиф хати юборилган. Сафар харажатлари учун йўл чипталаридан ташқари 20 минг доллар ажратилган.
“Аввалига фақат биз чақирилгандек туюлди. Лекин бошқа давлатлардан ҳам келган ижодкорларни кўриб, бир оз руҳиятим тушди”, дея эслайди у. Улар “Қалпоқ”дан ташқари экшн жанридаги фильм сценарийсини ҳам тайёрлаб боришган. Ҳажвий кўрсатув сценарийси скетч форматда бўлмагани учун қабул қилинмаган, аммо экшн фильм сценарийси кинокомпания томонидан олиб қолинган. Танлов натижалари 3 ойдан 1 йилгача муддатда маълум қилиниши айтилган, шу билан бирга жамоа иккинчи бор 15 кунлик сафар билан яна АҚШга таклиф этилган.
Суропов сафар давомида Нью-Йорк, Вашингтон ва Флоридада бўлганини, энг катта таассуротни эса Нью-Йорк қолдирганини айтиб ўтди. У ёмғирли кунда 600 километр йўл босиб ўтган қора машинанинг лойга ботмаганини ҳайрат билан эслайди. Шунингдек, Вашингтондан Флоридагача бўлган йўлнинг катта қисми ўрмонлар билан қоплангани ва табиатга муносабат уни ўйлантирганини таъкидлади.
Ижодкорнинг айтишича, “Қалпоқ”нинг бир кўрсатуви учун тахминан 700 доллар сарфланади ва деярли шу миқдорда даромад келади. Агар экшн фильм сценарийси ғолиб бўлса, камида 200 минг доллар гонорар олиш мумкин. Иккинчи сафарга у катта жамоа — Шерзод Каттабобоев, Ориф Султонов ва Фотима Назаровалар билан боришни режалаштирган, ҳатто “Қалпоқ”нинг янги йил сонини АҚШда суратга олиш нияти ҳам бор.
Суропов хорижда телефони ўғирлаб кетилганини ҳам афсус билан тилга олди. Телефон қиммат бўлмаган, аммо ичида йиллар давомида тўпланган сценарий ғоялари сақлангани уни қаттиқ ўйлантирган.
Суҳбат давомида у энг қизиқ хотираларидан бирини ҳам айтиб берди. Бир вақтлар телеканал реклама ролиги учун хўрозни телевизорни ёқишга ўргатган. Бир хонали квартирада яшаб, хўроз билан “машқ” қилгани, унинг ортидан гилам тозалаб юргани, суратга олиш пайтида эса хўроз режиссёр бақирганидан кейин барча ўрганган ҳаракатларини унутиб қўйгани кулгили тарзда эсга олинди.