Флик тежамкор трансферлар билан «Барселона»ни яна етакчи қилди

Ўтган мавсум "Барселона"ни Испания чемпионлигига олиб чиққан Ханс-Дитер Флик футболда муваффақият ҳар доим катта сармояга боғлиқ эмаслигини амалда исботлаб берди. Немис мутахассиси қисқа вақт ичида жамоа ўйинини тизимли равишда яхшилаб, кам харажат билан ҳам юқори натижага эришиш мумкинлигини кўрсатди.

Флик каталонияликлар бошқарувини қўлга олганидан бери трансфер бозорида жуда эҳтиёткор сиёсат олиб бормоқда. Манбаларга кўра, у шу пайтгача янги ўйинчилар учун бор-йўғи 88 миллион евро сарфлаган. Шунга қарамай, жамоа жорий мавсумда ҳам Испания Ла Лигасида барқарор ўйин намоён этиб, турнир жадвалида ишончли етакчиликни сақлаб келмоқда.

Қизиғи шундаки, Фликнинг бу натижалари Испаниянинг бошқа грандлари билан солиштирилганда янада ёрқин кўринади. Масалан, Мадриднинг "Атлетико" клуби сўнгги мавсумларда таркибни кучайтириш учун 364 миллион евро сармоя киритган. Ашаддий рақиб ҳисобланган "Реал" эса 216 миллион евро атрофида маблағни трансферларга йўналтирган.

Шу билан бирга, "Вильярреал" янги футболчилар учун 171 миллион евро ажратган бўлса, "Бетис" ҳам 101 миллион евро сарфлаб, бу кўрсаткич бўйича «Барселона»дан ошиб кетган.

Аммо рақамлар майдондаги ҳолатни тўлиқ акс эттирмайди. Флик бошчилигида «Барселона» жамоавий ўйин, интизом ва тактик мувозанатга таянаётгани билан ажралиб турибди. Бу эса мухлисларга шундай хулосани беради: ақлли стратегия ва тўғри ёндашув баъзан миллиардлардан ҳам қимматроқ бўлиши мумкин.