Британиялик боксчи Энтони Жошуа автоҳалокатга учрагани маълум бўлди
Ўта оғир вазн тоифасида собиқ жаҳон чемпиони Энтони Жошуа Нигерияда жиддий йўл-транспорт ҳодисасига дуч келди. Маҳаллий ҳуқуқ-тартибот идоралари ҳамда халқаро ОАВ тарқатган маълумотларга кўра, воқеа 29 декабрь куни Огун штати ҳудудидан ўтувчи Лагос — Ибадан автомобиль йўлида содир бўлган.
Хабар қилинишича, боксчи ўтирган автомобиль йўл четида ҳаракатсиз турган юк машинаси билан тўқнашиб кетган. Фожиали тўқнашув оқибатида камида икки нафар инсон ҳалок бўлгани айтилаётир. Айни пайтда ҳодиса сабаблари ўрганилмоқда, тегишли идоралар томонидан тергов ҳаракатлари олиб борилмоқда.
Энтони Жошуанинг ўзи эса ушбу автоҳалокатда енгил тан жароҳатлари олган. У эҳтиёт чораси сифатида шифохонага олиб кетилиб, тўлиқ тиббий кўрикдан ўтказилган. Шифокорлар хулосасига кўра, спортчининг ҳаётига ҳеч қандай хавф йўқ. Боксчининг вакиллари ҳам унинг аҳволи барқарор эканини ва ҳозирда шифокорлар назорати остида эканини тасдиқлади.
Маълумки, Жошуа сўнгги кунларда шахсий ташриф билан Нигерияда бўлиб турган. У ўзининг оилавий илдизлари боғлиқ бўлган ушбу мамлакатга вақти-вақти билан ташриф буюриб туради.
Ҳозирча ЙТҲнинг келиб чиқиш сабаблари ва эҳтимолий ҳуқуқий оқибатлари юзасидан қўшимча ахборот берилмади.
Маълумот ўрнида айтиш жоиз, Энтони Жошуа — Буюк Британиянинг энг таниқли профессионал боксчиларидан бири ҳисобланади. У 1989 йил 15 октябрда Уотфорд шаҳрида туғилган, Лондон–2012 Олимпиадаси чемпиони. Фаолияти давомида WBA, IBF, WBO ҳамда IBO йўналишлари бўйича жаҳон чемпиони унвонларини қўлга киритган. Кучли нокаутли зарбалари ва жисмоний қуввати билан танилган боксчи 2025 йилда бир йиллик танаффусдан кейин рингга қайтиб, 19 декабрь куни Жейк Полни олтинчи раундда нокаут билан мағлуб этган эди.
Мухлислар эса ҳозирда энг асосийси — Жошуанинг соғлиғи жойида экани ва унинг фаолияти давом этишига ҳеч қандай жиддий тўсиқ йўқлигидан хотиржам.