Америкалик актёр Жорж Клуни Франция фуқаролигини олгани маълум бўлди

Америкалик актёр Жорж Клуни ва унинг оила аъзолари Франция фуқаролигини олди. Бу ҳақда AFP агентлиги ҳукумат бюллетенига таяниб хабар берди. Хабар 30 декабр куни соат 14:53 да (Тошкент вақти билан) эълон қилинган. Бу ҳақда kursiv.uz хабар беради.

AFPга кўра, Клуни декабр бошида Францияда шахсий ҳаётни ҳимоя қилувчи қонунларни юқори баҳолаган. Унинг айтишича, бу меъёрлар оиласини папараццилардан асрашда муҳим роль ўйнайди. “Бу ерда болаларни суратга олишмайди. Мактаб дарвозаси олдида папараццилар йўқ. Биз учун энг асосийси ҳам шу”, — деган у.

Актёр 400 та дарс олганига қарамай, француз тилини ҳануз яхши ўзлаштира олмаганини тан олган. Шунга қарамай, у Франция маданияти ўзига ёқишини таъкидлаган.

Маълум бўлишича, Клуни 2021 йилдан бери Франция жанубидаги Domaine de Canadel номли мулкка эгалик қилади. У октябрь ойидаги интервьюсида Голливуд муҳитини инобатга олиб, фарзандларини Лос-Анжелесда катта қилишни истамаслигини айтган.

Жорж Клуни — актёр, режиссёр ва продюсер. У кенг оммага “Тез ёрдам” сериали орқали танилган, “Оушеннинг 11 дўсти”, “Қуёш ботишидан тонггача” каби фильмлар эса унинг халқаро шуҳратини янада мустаҳкамлаган. Клуни “Оскар” мукофотини икки бор — актёр ва продюсер сифатида қўлга киритган, шунингдек, “Олтин глобус” совриндори ҳамдир. У 2014 йилдан бери Амал Клуни (қизлик фамилияси — Аламуддин) билан турмуш қурган.